ఇల్లెందు, వెలుగు : ‘ప్రతి గడపకూ సంక్షేమ పథకం’ పేరుతో ఇల్లెందు ఎమ్మెల్యే కోరం కనయ్య నూతన ఒరవడికి శ్రీకారం చుట్టారు. ఇందులో భాగంగా శుక్రవారం వానను కూడా లెక్క చేయకుండా తానే స్వయంగా బైక్ నడుపుతూ ఇల్లెందు మున్సిపల్ పరిధిలోని పలు వార్డుల్లో లబ్ధిదారుల ఇండ్లకు నేరుగా వెళ్లి కల్యాణ లక్ష్మి, షాదీముబారక్ చెక్కులు, కొత్త రేషన్ కార్డులు అందజేశారు.
ఈ సందర్భంగా ఎమ్మెల్యే మాట్లాడుతూ గత బీఆర్ఎస్ ప్రభుత్వంలో ఏనాడు ఎమ్మెల్యేను కలిసే అవకాశం ప్రజలకు దక్కలేదని, తమ ప్రభుత్వంలో నేరుగా ఎమ్మెల్యేలు, మంత్రులే ప్రజల వద్దకు వస్తున్నారన్నారు. త్వరలో జరగనున్న స్థానిక సంస్థలు ఎన్నికల్లో కాంగ్రెస్ పార్టీని ఆదరించాలని కోరారు. ఈ కార్యక్రమంలో మార్కెట్ కమిటీ చైర్మన్ బానోత్ రాంబాబు, మాజీ మున్సిపల్ చైర్మన్లు దమ్మలపాటి వెంకటేశ్వరరావు, యదళ్లపల్లి అనసూయ, పట్టణ అధ్యక్షుడు దొడ్డ డానియల్ నాయకులు పాల్గొన్నారు.
