నారాయణ్ ఖేడ్, వెలుగు: ఖేడ్ నియోజకవర్గంలోని కల్హేర్ మండలం బీబీపేట గ్రామంలో ఓ ఇంటి పరిసరాలలో శనివారం చిరుత పిల్ల సంచరించింది. మధ్యాహ్నం సమయంలో అక్కడే కొంతసేపు తిరిగిన దృశ్యాలు సీసీ కెమెరాలో రికార్డ్ అయ్యాయి. వెంటనే గ్రామస్తులు ఫారెస్ట్ అధికారులకు సమాచారం ఇచ్చారు.
అటవీ ప్రాంతం బార్డర్లో ఉన్న నాగధర్, బీబీ, సంజీరావుపేట గ్రామాల్లో తరచు చిరుత పులి కనిపిస్తుండడంతో ఆయా గ్రామాల ప్రజలు భయాందోళనకు గురవుతున్నారు. ఇటీవల బీబీపేట శివారులో చిరుతపులి ఓ లేగదూడను చంపి తిన్నది. నల్లవాగు చుట్టుపక్కల ప్రాంతాల్లో తిరుగుతుందని గ్రామస్తులు చెబుతున్నారు. ఫారెస్ట్ అధికారులు స్పందించి వెంటనే చిరుత పులిని దాని పిల్లను పట్టుకోవాలని కోరుతున్నారు.
