మెగా పవర్ స్టార్ రామ్ చరణ్, బాలీవుడ్ బ్యూటీ జాన్వీ కపూర్ తొలిసారిగా జంటగా నటిస్తున్న స్పోర్ట్స్ డ్రామా చిత్రం 'పెద్ది' ప్రస్తుతం టాలీవుడ్‌లో హాట్ టాపిక్‌గా మారింది. 'ఉప్పెన' ఫేమ్ బుచ్చిబాబు సానా దర్శకత్వం వహిస్తున్న ఈ ప్రతిష్టాత్మక ప్రాజెక్ట్ షూటింగ్ శరవేగంగా జరుగుతోంది. రామ్ చరణ్ పుట్టినరోజు కానుకగా మార్చి 27, 2026 న ప్రపంచవ్యాప్తంగా గ్రాండ్‌గా విడుదల కానున్న ఈ మూవీపై అంచనాలు ఆకాశాన్ని తాకుతున్నాయి. ఈ సినిమాకు ఆస్కార్ విజేత ఏఆర్ రెహమాన్ సంగీతం అందిస్తుండటం, రత్నవేలు సినిమాటోగ్రఫీ, శివ రాజ్‌కుమార్, జగపతి బాబు వంటి అగ్ర నటులు కీలక పాత్రల్లో నటిస్తుండటంతో ఇది పాన్-ఇండియా రేంజ్‌ను అందుకునేందుకు సిద్ధంగా ఉంది.
జాన్వీ పాత్రకు డూప్‌గా 'మసూద'బంధవి శ్రీధర్'?
లేటెస్ట్ గా ఈ సినిమా సెట్స్‌పై వినిపిస్తున్న ఓ ఆసక్తికరమైన వార్త సినీ వర్గాల్లో చర్చనీయాంశమైంది. 'పెద్ది'లో జాన్వీ కపూర్ పోషిస్తున్న 'అచ్చియమ్మ' పాత్రకు సంబంధించిన కొన్ని కీలక సన్నివేశాల్లో ఆమె డూప్‌గా మరో నటి నటిస్తున్నట్లు టాలీవుడ్ వర్గాల టాక్ వినిపిస్తోంది. ఆ నటి మరెవరో కాదు, హారర్ చిత్రం 'మసూద'లో దెయ్యం పట్టిన యువతి పాత్రలో నటించి మంచి గుర్తింపు తెచ్చుకున్న బంధవి శ్రీధర్. జాన్వీ కపూర్, బంధవి శ్రీధర్ ఇద్దరి హైట్ దాదాపు సమానంగా ఉండటం, బాడీ లాంగ్వేజ్ కూడా దగ్గరగా ఉండటంతో చిత్ర బృందం ఈ నిర్ణయం తీసుకున్నట్లు సమాచారం. ప్రధానంగా బ్యాక్ షాట్స్, వైడ్ యాంగిల్ షాట్స్, రిస్కీ సన్నివేశాల్లో జాన్వీ స్థానంలో బంధవి శ్రీధర్ కనిపించే అవకాశం ఉందని తెలుస్తోంది.
నిర్మాణ వ్యయ భారాన్ని తగ్గించుకునేందుకేనా?
సాధారణంగా పెద్ద బడ్జెట్ చిత్రాల్లో క్లిష్టమైన సన్నివేశాలు, రిస్కీ షాట్‌లకు డూప్‌లను ఉపయోగించడం పరిపాటి. అయితే, ఇక్కడ నటీమణుల హైట్, లుక్స్ దగ్గరగా ఉండటం ఒక కారణంగా చెబుతున్నప్పటికీ, ప్రొడక్షన్ ఖర్చులను తగ్గించుకునే వ్యూహంలో భాగంగానే ఈ నిర్ణయం తీసుకుని ఉంటారని ఇండస్ట్రీ వర్గాలు భావిస్తున్నాయి. ప్రస్తుతం శ్రీలంక, పూణే, హైదరాబాద్ వంటి ప్రాంతాల్లో కీలక షెడ్యూల్స్ పూర్తి చేసుకున్న 'పెద్ది' టీమ్... పీరియడ్ సెట్టింగ్స్, భారీ యాక్షన్ బ్లాక్‌లతో సినిమాను అత్యంత ప్రతిష్టాత్మకంగా తెరకెక్కిస్తున్నారు. ఇలాంటి మెగా ప్రాజెక్ట్‌లో డూప్ వాడకం వార్త బయటకు రావడంతో అభిమానులు దీనిపై అధికారిక స్పందన కోసం ఆసక్తిగా ఎదురుచూస్తున్నారు.
