- దరఖాస్తు చేసుకున్న ప్రతి విద్యార్థికి సీటు ఇవ్వాలి : ఆర్.కృష్ణయ్య
మెహిదీపట్నం, వెలుగు: రాష్ట్రంలో మరో 119 బీసీ గురుకులాలు ఏర్పాటు చేయాలని, దరఖాస్తు చేసుకున్న ప్రతివిద్యార్థికి సీటు ఇవ్వాలని బీసీ సంఘం జాతీయ అధ్యక్షుడు, రాజ్యసభ సభ్యుడు ఆర్.కృష్ణయ్య డిమాండ్ చేశారు. సోమవారం సాయంత్రం హైదరాబాద్ లోని మాసబ్ ట్యాంక్ గురుకుల భవనాన్ని సంఘం నాయకులు నీలం వెంకటేశ్, గిల్లపల్లి అంజి ఆధ్వర్యంలో ముట్టడించారు. ఈ సందర్భంగా ఆయన మాట్లాడుతూ.. ఇప్పటివరకు ఉన్న గురుకులాల్లో వసతి సౌకర్యం ఉన్నచోట 5, 6, 7, 8 తరగతుల్లో అదనపు సెక్షన్లు ప్రారంభించాలన్నారు.
లక్షల సంఖ్యలో అప్లికేషన్లు వస్తే వేల మంది పిల్లలకు మాత్రమే సీట్లు ఇచ్చారని పేర్కొన్నారు. జిల్లాల నుంచి ఎంతోమంది తల్లిదండ్రులు హైదరాబాద్ వచ్చి, ఆఫీస్ల చుట్టూ తిరుగుతున్నారని తెలిపారు. ఈ విషయంలో ప్రభుత్వం చొరవ తీసుకొని, గురుకులాల సంఖ్యను పెంచాలని ఆయన కోరారు. నాయకులు అరవింద్, వెంకట్, శివ, నరేశ్, కౌశిక్, నిఖిల్ పటేల్ తదితరులు ఉన్నారు.
