- మరో ఐదుగురిని కరిచిన కుక్కలు
- శంషాబాద్ పరిధి మధురానగర్లో ఘటన
శంషాబాద్, వెలుగు: గ్రేటర్లో వీధి కుక్కల దాడులు ఆగడం లేదు. శంషాబాద్ పరిధి మధురానగర్ కాలనీ రోడ్ నం. 9లో శనివారం ఒక్కరోజే ఆరుగురిపై కుక్కలు దాడులు చేశాయి. మధ్యాహ్నం అక్షర(4) అనే బాలిక ఇంటి బయట ఆడుకుంటుండగా ఓ వీధి కుక్క దాడి చేసింది. చిన్నారి మొహాన్ని గాయపర్చింది. వెంటనే స్థానికులు గాయపడ్డ బాలికను ప్రైవేటు హాస్పిటల్కు తీసుకెళ్లారు.
అక్కడి నుంచి మెరుగైన వైద్యం కోసం నారాయణగూడలోని ఐపీఎం హాస్పిటల్కు తరలించారు. అదే ఏరియాలోని మరో ఐదుగురిపైనా కుక్కలు దాడులు చేయగా.. వారు ప్రైవేటు హాస్పిటల్లో ట్రీట్ మెంట్ తీసుకుంటున్నారు. మధురా నగర్ కాలనీలో వందలాది వీధి కుక్కలు స్వైర విహారం చేస్తున్నా మున్సిపల్ అధికారులు పట్టించుకోవడం లేదని స్థానికులు ఆవేదన వ్యక్తం చేశారు. కుక్కల నివారణకు చర్యలు తీసుకోవాలని డిమాండ్ చేశారు.
