తిరుమల ఘాట్ రోడ్డులో ఘోర ప్రమాదం జరిగింది. కారు అదుపుతప్పి రైలింగ్ ను ఢీకొనడంతో ముందు భాగం పూర్తిగా నుజ్జు నుజ్జయ్యింది. శనివారం ( జులై 18 ) జరిగిన ఈ ఘటనకు సంబంధించి వివరాలిలా ఉన్నాయి.. తిరుమల మొదటి ఘాట్ రోడ్డులోని 39వ మలుపు దగ్గర కారు అదుపుతప్పి రైలింగ్ ను ఢీకొట్టింది. దీంతో కారు ముందు భాగం పూర్తిగా నుజ్జు నుజ్జయ్యింది.
ఈ ఘటనలో కారులో ప్రయాణిస్తున్న తెలంగాణకు చెందిన భక్తులకు స్వల్ప గాయాలయ్యాయి. శ్రీవారి దర్శనం అనంతరం తిరుమల నుంచి తిరుపతికి వస్తుండగా ప్రమాదం జరిగింది. ఈ ఘటనలో ప్రాణనష్టమేమీ జరగకపోవడంతో అంతా ఊపిరి పీల్చుకున్నారు.
ప్రమాదం జరిగిన సమయంలో ఘాట్ రోడ్డులో కాసేపు ట్రాఫిక్ జామ్ అయ్యింది. ఈ ఘటనపై సమాచారం అందుకున్న విజిలెన్స్ సిబ్బంది ట్రాఫిక్ పోలీసులు ఘటనాస్థలానికి చేరుకొని ట్రాఫిక్ ను క్లియర్ చేశారు. క్షతగాత్రులను చికిత్స కోసం ఆసుపత్రికి తరలించారు.ప్రమాదానికి గల కారణాలపై ఆరా తీస్తున్నారు పోలీసులు.
