బషీర్బాగ్, వెలుగు: భారీ వర్షాలతో బేగంబజార్ సంతోషిమాత దేవాలయం సమీపంలో వందేళ్ల పురాతన భవనం గురువారం తెల్లవారుజామున కుప్పకూలింది. ఇందులో గత 20 ఏండ్లుగా ఎవరూ నివాసం ఉండడం లేదు. ప్రమాదం జరిగినప్పుడు పరిసర ప్రాంతాల్లో ఎవరూ లేకపోవడంతో ప్రాణనష్టం తప్పింది. జీహెచ్ఎంసీ అధికారులు జేసీబీ సహాయంతో శిథిలాలను తొలగించారు. మరోవైపు గోషామహల్ నియోజవర్గంలోని పురాతన భవనాల్లో పలువురు వ్యాపారాలను కొనసాగిస్తున్నారు. వెంటనే ఆ దుకాణాలను ఖాళీ చేసి వెళ్లాల్సిందిగా జీహెచ్ఎంసీ అధికారులు వారికి విజ్ఞప్తి చేశారు. ఒకటి రెండు రోజుల్లో నోటీసులు కూడా పంపిస్తామన్నారు.
