హైదరాబాద్, వెలుగు: రాష్ట్రంలోని పాలిటెక్నిక్ కాలేజీల్లో దాదాపు 30 శాతం సీట్లు మిగిలిపోయాయి. శుక్రవారం టీఎస్ పాలిసెట్–2023 ఫైనల్ ఫేజ్ సీట్లు అలాట్మెంట్ చేశారు. మొత్తం 118 కాలేజీల్లో 31,739 సీట్లుంటే, వాటిలో 22,144(69.76%) సీట్లు స్టూడెంట్లకు కేటాయించారు. మరో 9,595 సీట్లు మిగిలిపోయాయి. పాలిసెట్కు మొత్తం 80,358 మంది క్వాలిఫై అయితే.. ఫైనల్ ఫేజ్లో కేవలం 14,136 మంది మాత్రమే ఆప్షన్లు ఇచ్చారు. 56 గవర్నమెంట్ పాలిటెక్నిక్ కాలేజీల్లో 13,494 సీట్లకు 11,336(84%) సీట్లు అలాట్ కాగా, 62 ప్రైవేటు కాలేజీల్లో 18,245 సీట్లకు 10,808 (59.23%) సీట్లు నిండాయి. స్టేట్లో మూడు కాలేజీల్లో వందశాతం సీట్లు నిండాయి. దాంట్లో రెండు సర్కారువి, ఒకటి ప్రైవేటు కాలేజీ ఉంది. సీట్లు అలాటైన అభ్యర్థులు ఈనెల 17లోగా కాలేజీల్లో రిపోర్టు చేయాలని, లేకపోతే సీట్లు రద్దవుతాయని విద్యాశాఖ కార్యదర్శి వాకాటి కరుణ తెలిపారు.
డిప్లొమాలోనూ సీఎస్ఈ హవా..
ఇంజినీరింగ్ కాలేజీలతో పాటు పాలిటెక్నిక్ డిప్లొమా కాలేజీల్లోనూ కంప్యూటర్ సైన్స్ అండ్ ఇంజినీరింగ్ (సీఎస్ఈ) బ్రాంచ్కు డిమాండ్ పెరిగింది. మొత్తం 22,144 సీట్లు స్టూడెంట్లకు అలాట్ చేస్తే, దాంట్లో 5,897 సీట్లు సీఎస్ఈ బ్రాంచ్వే. ఇందులో కేవలం 833 సీట్లు మాత్రమే మిగిలాయి. ఈసీఈలో 6,010 సీట్లకు 4,965 సీట్లు నిండగా, ఈఈఈలో 6,489 సీట్లకు 4,175 సీట్లు, సివిల్ ఇంజినీరింగ్లో 4,861 సీట్లకు 2,874 సీట్లు, మెకానికల్ ఇంజినీరింగ్లో 4,449 సీట్లకు 2,279 సీట్లు స్టూడెంట్లకు అలాట్ చేశారు.
