టౌన్లలో ప్రైవేటు.. ఊర్లలో సర్కార్

టౌన్లలో ప్రైవేటు స్కూళ్లకు ఊర్లలో సర్కార్ బడులకు స్టూడెంట్ అడ్మిషన్ల తీరిది
ప్రైవేటు సంస్థల్లో అర్బన్లో 77%.. రూరల్ లో 33% స్టూడెంట్స్
సర్కారీ సంస్థల్లో రూరల్లో 66%.. అర్బన్లో 19.75% స్టూడెంట్స్
హైదరాబాద్లోనూ భారీ తేడా.. విద్యాశాఖ లెక్కల్లో వెల్లడి

హైదరాబాద్, వెలుగు: రాష్ట్రంలో పట్టణ, గ్రామీణ ప్రాంతాల్లోని విద్యా సంస్థల అడ్మిషన్లలో భారీ తేడా కనబడుతోంది. టౌన్లలో ప్రైవేటు విద్యా సంస్థల్లో అడ్మిషన్లు ఎక్కువగా జరిగితే, రూరల్ ప్రాంతాల్లో సర్కారీ విద్యాసంస్థల్లో ఎక్కువగా ఉంటున్నాయి. హైదరాబాద్లో సర్కారీ బడులు, కాలేజీల్లో 16.64 శాతం మందే చదువుతుండగా.. ప్రైవేటులో 78.68 శాతం ఉన్నారు. రాష్ట్రంలో అతి తక్కువగా మేడ్చల్ జిల్లాలో 15.88 శాతం మంది మాత్రమే సర్కారీ బడులు, కాలేజీల్లో చదువుతుండగా.. అత్యధికంగా మెదక్ (73.05%), ములుగు (73.77%) జిల్లాల్లో చదువుతున్నారు. విద్యా శాఖ తీసిన లెక్కల్లో ఈ వివరాలు వెల్లడయ్యాయి.

ప్రైవేటులో స్టూడెంట్స్ పెరిగారు

రాష్ట్రంలో 2017–18తో పోలిస్తే 2018–19లో 27,629 మంది స్టూడెంట్లు పెరిగారు. సర్కారీ సంస్థల్లో 39,107 మంది తగ్గిపోగా.. ప్రైవేటులో 77,447 మంది పెరిగారు. సర్కారులో విద్యా సంస్థల సంఖ్య పెరిగినా స్టూడెంట్లు తగ్గిపోయారు. స్టూడెంట్ల సంఖ్యలో హైదరాబాద్ జిల్లా టాప్లో ఉంది. ఇక్కడ 9,46,348 మంది స్టూడెంట్స్ ఉండగా, అతి తక్కువగా ములుగు జిల్లాలో 42,684 మందే ఉన్నారు.

స్టూడెంట్ల లెక్కలు ఇవీ..

యూడైస్ 2018–19 లెక్కల ప్రకారం.. 33 జిల్లాల్లో 42,355 స్కూళ్లు, ఇంటర్ స్థాయిలోపు కాలేజీలు ఉన్నాయి. వాటిలో మొత్తంగా 65,56,701 మంది స్టూడెంట్లు చదువుతున్నారు.

మొత్తం స్టూడెంట్లలో ఎలిమెంటరీ స్థాయి వారు 47,36,152 మందికాగా, మిగతా వారంతా సెకండరీ, హయ్యర్ సెకండరీ స్టూడెంట్లు.

సర్కారీ విద్యాసంస్థల్లో 28,22,435 మంది, ఎయిడెడ్లో 1,07,531 మంది, ప్రైవేటులో 36,13,352 మంది, గుర్తింపు లేని ఇతర విద్యాసంస్థల్లో 13,383 మంది చదువుతున్నారు.

హైదరాబాద్, కరీంనగర్, మేడ్చల్, నిజామాబాద్, పెద్దపల్లి, రంగారెడ్డి, వరంగల్ అర్బన్ జిల్లాల్లో ‘ప్రైవేటు’ చదువులు ఎక్కువగా ఉన్నాయి.

రూరల్లో సర్కారు హవా..

రూరల్ఏరియాల్లోని 30,982 (73.15%) విద్యాసంస్థల్లో 33,12,913 మంది చదువుతుండగా.. అర్బన్ఏరియాల్లోని 11,373 ( 26.85%) విద్యాసంస్థల్లో 32,43,788 మంది ఉన్నారు.

రూరల్ ప్రాంతాల్లోని స్టూడెంట్లలో సర్కారీసంస్థల్లో 21,81,875(65.86%) మంది, ప్రైవేటులో 11,16,637 (33.71%), ఎయిడెడ్లో 10,659 (0.32%), ఇతర విద్యాసంస్థల్లో 3,742 (0.11%) మంది చదువుతున్నారు.

అర్బన్ఏరియాలో ప్రైవేటు సంస్థల్లో 24,96,715 (76.97%) మంది, సర్కారు సంస్థల్లో 6,40,560 (19.75%), ఎయిడెడ్లో 96,872 (2.99%), ఇతర సంస్థల్లో 9,641 (0.30%) మంది ఉన్నారు.