8 సంవత్సరాల వయస్సు. ఈ ఏజ్లో పెద్దగా కష్టాలు, బాధల గురించి కూడా ఏమి తెలియదు. స్కూల్కు వెళ్తూ సరదాగా ఫ్రెండ్స్తో ఆడుకునే స్టేజ్. కానీ ఈ వయస్సులో ఓ బాలుడు ఎవరి తీసుకోని నిర్ణయం తీసుకున్నాడు. ఏం కష్టమొచ్చిందో తెలియదు గానీ ఎనిమిదేళ్ల వయస్సులో ఉరివేసుకుని ఆత్మహత్యకు పాల్పడ్డాడు. ఈ విషాద ఘటన హైదరాబాద్ శివారు మైలార్దేవ్పల్లి పోలీస్ స్టేషన్ పరిధిలో జరిగింది. ఈ ఘటనకు సంబంధించిన వివరాలు ఇలా ఉన్నాయి.
ఉత్తరప్రదేశ్‌లోని ప్రతాప్‌గఢ్‌కు చెందిన ఓ కార్మిక కుటుంబం హైదరాబాద్కు వలస వచ్చింది. నగర శివారు మైలార్దేవ్పల్లి పోలీస్ స్టేషన్ పరిధిలోని లక్ష్మీగూడలో నివాసం ఉంటుంది. వీరికి ఐదు సంవత్సరాల బాలిక, ఎనిమిది సంవత్సరాలు కొడుకు ఉన్నారు. కాటేదాన్‌లోని ఓ కంపెనీలో భార్యభర్తలు పని చేస్తున్నారు. రోజు మాదిరిగానే ఆదివారం (నవంబర్ 1) భార్యభర్తలు పనికి వెళ్లారు. తల్లిదండ్రులు పని వెళ్లిన సమయంలో ఎనిమిదేళ్ల కుమారుడు ఇంట్లో ఫ్యాన్కు ఉరి వేసుకుని ఆత్మహత్యకు పాల్పడ్డాడు.
పని ముగించుకుని సాయంత్రం ఇంటికి తిరిగివచ్చిన తల్లిదండ్రులు కొడుకు ఫ్యాన్కు వేలాడుతూ ఉండటాన్ని చూసి దిగ్భ్రాంతికి గురయ్యారు. అప్పటికే కొడుకు మృతి చెందడంతో గుండెలవిసేలా రోదించారు. మైలార్దేవ్పల్లి పోలీసులు ఈ ఘటనపై కేసు నమోదు చేసి దర్యాప్తు చేపట్టారు. బాలుడి ఆత్మహత్యకు గల కారణాలపై వివిధ కోణాల్లో ఆరా తీస్తున్నారు. ఎనిమిదేళ్ల బాలుడు ఉరివేసుకుని ప్రాణాలు తీసుకోవడం స్థానికంగా తీవ్ర చర్చనీయాంశంగా మారింది.
