నిజామాబాద్, వెలుగు: గంజాయి తాగనని చెప్పిన క్లాస్‌‌మేట్‌‌ను తోటి విద్యార్థులు చావబాదారు. చేతి కడేలతో ఇష్టమొచ్చినట్టు కొట్టడంతో అతను స్పృహ కోల్పోయాడు. నిజామాబాద్ జిల్లా మాక్లూర్ మండలం కల్లెడ జడ్పీ హైస్కూల్‌‌లో ఈనెల 16న ఈ ఘటన జరిగింది. స్టూడెంట్ తల్లి గురువారం పోలీసులకు ఫిర్యాదు చేయడంతో విషయం వెలుగులోకి వచ్చింది. గతంలో వేరే స్కూలులో చదువుకున్న తమ కొడుకును ఈ ఏడాది గ్రామంలోని జిల్లా పరిషత్ స్కూల్‌‌లో టెన్త్‌‌లో పేరెంట్స్ చేర్పించారు. అయితే అదే క్లాస్‌‌కు చెందిన కొందరు గంజాయికి అలవాటుపడ్డారు. ఈ క్రమంలో గంజాయి తాగాలంటూ బాధిత బాలుడిని తరచూ ఒత్తిడి చేస్తున్నారు.
విషయం తన తల్లికి చెప్పిన బాధితుడు.. తనను వేరే స్కూల్‌‌లో చేర్పించాలని కోరాడు. మధ్యలో బడి మార్చడం సాధ్యం కాదని తల్లి సముదాయించడంతో అదే స్కూల్కి వెళ్తున్నాడు. గత శనివారం మధ్యాహ్నం గంజాయి మత్తులో ఉన్న ఆరుగురు విద్యార్థులు తమతో కలిసి గంజాయి తాగాలని బాలుడిని బెదిరించారు. టీచర్కు చెబుతానని అతడు హెచ్చరించడంతో.. మాట్లాడుకుందామని స్కూల్ నుంచి బయటకు తీసుకెళ్లి దాడి చేశారు.
చేతికి ధరించిన ఐరన్ కడేలతో కొట్టారు. దీంతో బాధితుడు స్పృహ కోల్పోయాడు. విషయం తెలిసి పేరెంట్స్.. కొడుకును నిజామాబాద్లోని ఓ ఆస్పత్రిలో చేర్పించారు. ప్రస్తుతం ఐసీయూలో చికిత్స పొందుతున్నాడు. కొడుకు పరిస్థితి మెరుగుకాకపోవడంతో గురువారం మాక్లూర్ పోలీసులకు ఫిర్యాదు చేశారు. దెబ్బల తీవ్రతకు బాలుడి తల, పక్కటెముకల్లో రక్తం గడ్డకట్టిందని డాక్టర్లు చెప్పారని అతని తల్లిదండ్రులు వెల్లడించారు.
