నల్లగొండ: రాబోయే మూడేండ్లలో నల్గొండ పట్టణంలో ఇళ్లు లేని ప్రతి ఒక్కరికీ ఇల్లు కట్టిస్తామని మంత్రి కోమటిరెడ్డి వెంకట్ రెడ్డి హామీ ఇచ్చారు. సోమవారం (మార్చి 16) నల్గొండలోని క్లాక్ టవర్ సెంటర్ మదీనా మజీద్లో ఇఫ్తార్ విందు ఏర్పాటు చేశారు. మంత్రి కోమటిరెడ్డి ఈ కార్యక్రమంలో పాల్గొన్నారు. రంజాన్ పండుగకు అన్ని ఏర్పాట్లు పూర్తి చేయాలని అధికారులను ఆదేశించారు. ముస్లింలకు రంజాన్ శుభాకాంక్షలు చెప్పారు.
ఈ సందర్భంగా ఆయన మాట్లాడుతూ.. దేశంలో ఏకైక సెక్యులర్ పార్టీ కాంగ్రెస్ అని అన్నారు. కేంద్రంలోని బీజేపీ కులమతాలను రెచ్చగొడుతూ రాజకీయాలు చేస్తుందని విమర్శించారు. సంవత్సరానికి 2 కోట్ల మంది నిరుద్యోగులకు ఉద్యోగాలు కల్పిస్తామని మోసం చేసిందని ఆగ్రహం వ్యక్తం చేశారు. మైనార్టీ సంక్షేమానికి కాంగ్రెస్ ప్రభుత్వం కట్టుబడి ఉందని పేర్కొన్నారు.
దివంగత నేత వైఎస్ఆర్ హయాంలోనే ముస్లింలకు 4 శాతం రిజర్వేషన్లు అమలు అయ్యాయని గుర్తు చేశారు. నల్లగొండ పట్టణంలో గత 30 సంవత్సరాలుగా హిందూ ముస్లింలంతా కలిసిమెలిసి ప్రశాంత వాతావరణంలో పండుగలు జరుపుకుంటున్నారని అన్నారు. ముస్లింలంతా రంజాన్ పండుగను ప్రశాంత వాతావరణంలో ఆనందంగా జరుపుకోవాలని ఆకాంక్షించారు.
