- పచ్చి బాలింతను అడవిలో వదిలేసి..3 కిలోమీటర్లు నడిపించిన్రు
- తొవ్వ సరిగ లేదని మధ్యలోనే దించేసిన 102 సిబ్బంది
- చంటి బిడ్డతో వానలో తడుస్తూ.. ఇల్లు చేరిన గిరిజన మహిళ
కాగజ్ నగర్, వెలుగు: తొవ్వ సరిగ లేదని అడవి మధ్యలోనే దించేయడంతో.. ప్రసవించిన గంటల వ్యవధిలోనే ఓ బాలింత రాళ్లూ రప్పల మీద మూడు కిలోమీటర్లు నడవాల్సి వచ్చింది.102 సిబ్బంది నిర్వాకానికి చంటి బిడ్డతో వర్షంలో తడుస్తూ ఇల్లు చేరింది. ఈ ఘటన గురువారం సాయంత్రం కుమ్రంబీం ఆసిఫాబాద్ జిల్లా పెంచికల్పేట మండలంలో జరిగింది. బాధితురాలు, గ్రామస్తులు తెలిపిన వివరాల ప్రకారం.. మండలంలోని మురళిగూడ పంచాయతీలోని జిల్లెడకు చెందిన కోరేటి కవితకు నొప్పులు రావడంతో బుధవారం కాగజ్నగర్ పీహెచ్సీకి తీసుకెళ్లారు. అదే రోజు రాత్రి11.20 నిమిషాలకు ఆమె కాన్పు చేయగా ఆడబిడ్డకు జన్మనిచ్చింది. ఆమెను కొన్ని గంటల పాటు పర్యవేక్షణలో ఉంచిన పీహెచ్సీ సిబ్బంది గురువారం మధ్యాహ్నం102 వాహనంలో ఇంటికి పంపారు. ఆస్పత్రి నుంచి బయలుదేరిన102 వాహనం పెంచికల్పేట మండలం కమ్మర్గాం మీదుగా అటవీ ప్రాంతానికి చేరింది. ఇక ముందుకు వెళ్లలేనని డ్రైవర్కవితను ఆమెతోపాటు ఉన్న భర్త రమేశ్, అత్త, తల్లిని అక్కడే దించేశాడు. ఈ దారిలో ఆటోలు, టాటా మ్యాజిక్లు నడుస్తాయని బాలింత సహా ఆమె కుటుంబీకులు ఎంత బతిమిలాడిన వినలేదు. దీంతో చంటిబిడ్డను కుటుంబీకులు ఎత్తుకోగా, ఆమె వారితో పాటు మూడు కిలోమీటర్లు నడిచింది. బాలింతతో పాటు పాప వర్షంలో తడుస్తూ రాత్రిలోగా ఇల్లు చేరారు. ఈ ఘటనపై డిప్యూటీ డీఎంహెచ్వో సీతారాం నాయక్ను వివరణ కోరగా.. విషయం తెలిసిందని, 102 సిబ్బందిపై శాఖాపరమైన చర్యలకు ఉన్నతాధికారులకు ప్రతిపాదించినట్లు తెలిపారు.
