భారత విశిష్ట గుర్తింపు ప్రాధికార సంస్థ ( UIDAI) 5 నుండి 15 సంవత్సరాల వయస్సు పిల్లలకు ఆధార్‌లో తప్పనిసరి బయోమెట్రిక్ అప్ డేట్స్ (MBUలు) చేసేందుకు కొత్త మార్గదర్శకాలను జారీ చేసింది. దీనికి సంబంధించి స్కూల్స్ లో ప్రత్యేక శిబిరాలు నిర్వహించడం ద్వారా పెండింగ్‌లో ఉన్న MBUలను పూర్తి చేయాలని UIDAI చీఫ్ భువనేష్ కుమార్ రాష్ట్రాలు అలాగే కేంద్రపాలిత ప్రాంతాలకు (UTలు) లేఖ రాసారు.
ఎలక్ట్రానిక్స్ & ఐటీ మంత్రిత్వ శాఖ విడుదల చేసిన ప్రకటన ప్రకారం UIDAI స్కూల్ ఎడ్యుకేషన్ & లిటరసీ శాఖతో కలిసి పనిచేస్తుంది. ఇందులో భాగంగా స్కూల్ విద్య సమాచార వ్యవస్థ అయిన Unified District Information System for Education Plus (UDISE+) అప్లికేషన్‌లో విద్యార్థుల ఆధార్ బయోమెట్రిక్ అప్డేట్ స్టేటస్ తెలుసుకోవచ్చు. దీని ద్వారా ఏ విద్యార్థులకు బయోమెట్రిక్ అప్డేట్ అవసరమో స్కూళ్లకు తెలుస్తుంది. దీనివల్ల దాదాపు 17 కోట్ల మంది విద్యార్థులకు ఆధార్ బయోమెట్రిక్ అప్‌డేట్‌లు ఈజీగా పూర్తి చేయవచ్చు.
బయోమెట్రిక్ అప్డేట్ ఎందుకు: పిల్లలకు ఐదేళ్లు లేదా పదిహేనేళ్లు వచ్చినప్పుడు ఆధార్‌లో బయోమెట్రిక్స్ అప్డేట్ చేయించడం చాలా ముఖ్యం. ఎందుకంటే ఆధార్ డేటా ఖచ్చితత్వాన్ని, విశ్వసనీయత కాపాడుతుంది. బయోమెట్రిక్ అప్డేట్ చేయకపోతే భవిష్యత్తులో చాలా సమస్యలు ఎదురవవచ్చు. అలాగే ప్రభుత్వ పథకాల ప్రయోజనాలు పొందడంలో ఇబ్బందులు ఎదురవుతాయి. ఇంకా NEET, JEE, CUET వంటి కంపిటేటివ్ పరీక్షలకు, యూనివర్సిటీ ఎంట్రీ పరీక్షలకు రిజిస్టర్ చేసుకునేటప్పుడు సమస్యలు రావచ్చు. అందువల్ల ఈ కొత్త మార్గదర్శకాల ప్రకారం స్కూల్లోనే అప్డేట్ చేయించుకోవడం ద్వారా ఈ ఇబ్బందులను నివారించవచ్చని UIDAI చెబుతుంది.
