న్యూఢిల్లీ: ప్రజలకు సంబంధించి అయోధ్య వివాదం ముగిసిపోయిందని మైనారిటీ వ్యవహారాల మంత్రి ముక్తార్ అబ్బాస్ నఖ్వీ చెప్పారు. అన్ని వర్గాల ప్రజలూ సుప్రీం తీర్పును స్వాగతించారని మంత్రి ఆదివారం ఓ ఇంటర్వ్యూలో చెప్పారు. సుప్రీం తీర్పు తర్వాత సమాజంలో పెరిగిన ఐకమత్య భావనను దెబ్బతీయడానికి కొంతమంది తప్పుడు ఆరోపణలు చేస్తున్నారని విమర్శించారు. ప్రజల్లో పెరిగిన యూనిటీని జీర్ణించుకోలేకపోతున్నారంటూ ముస్లిం పర్సనల్లా బోర్డు, జమైతే ఉలేమా హింద్ సంస్థలను ఆయన పరోక్షంగా విమర్శించారు. ‘ముస్లింలకు ఇప్పుడు మసీదు ముఖ్యం కాదు.. విద్య, ఆర్థిక, సామాజిక అభివృద్ధి ముఖ్యం’ అని అన్నారు. ప్రజాస్వామ్య దేశంలో ఎవరు ఎలాంటి అభిప్రాయాన్నైనా కలిగి ఉండొచ్చని, ఎవరైనా సరే కోర్టులను ఆశ్రయించొచ్చని మంత్రి చెప్పారు. ఈ నెల 3 లేదా 4న అయోధ్య తీర్పుపై రివ్యూ పిటిషన్ దాఖలు చేస్తామని జమైతే, 9న రివ్యూ కోరతామని ముస్లిం లా బోర్డు గతంలోనే ప్రకటించాయి. పిటిషన్కు సంబంధించి ఇప్పుడు డ్రాఫ్ట్ సిద్ధం చేస్తున్నట్లు సమాచారం. దీనిపై మంత్రి ఆగ్రహం వ్యక్తం చేస్తూ.. సమాజంలో చీలిక తేవాలన్నదే వాళ్ల ఉద్దేశమని ఆరోపించారు. తమ వాదనను మొత్తం సమాజంపై రుద్దాలన్న ప్రయత్నం సరికాదని ముక్తార్ అబ్బాస్ నఖ్వీ గుర్తుచేశారు.
