కాబూల్: జమ్మూ కాశ్మీర్లోని పహల్గాంలో 2025, ఏప్రిల్ 18న పాక్ ప్రేరేపిత ఉగ్రవాదులు మారణహోమం సృష్టించిన విషయం తెలిసిందే. పహల్గాంలోని పచ్చని ప్రకృతి అందాలు తిలకిద్దామని వచ్చిన పర్యాటకులపై ఉగ్రమూకలు బుల్లెట్ల వర్షం కురిపించారు. ఈ టెర్రర్ ఎటాక్లో మొత్తం 26 మంది ప్రాణాలు కోల్పోయారు. ఈ ఘటనపై తీవ్ర ఆగ్రహం వ్యక్తం చేసిన ఇండియా.. ఉగ్రవాదాన్ని పెంచిపోషిస్తోన్న పాకిస్థాన్కు తగిన బుద్ధి చెప్పేందుకు సంచలన నిర్ణయం తీసుకుంది.
ఈ మేరకు పాకిస్తాన్తో సింధూ నది జలాల ఒప్పందాన్ని ఇండియా రద్దు చేసుకుంది. దీంతో పాక్లో తీవ్ర నీటి సంక్షోభం ఏర్పడింది. ఇదిలా ఉంటే.. ఇటీవల ఆప్ఘానిస్తాన్తో కూడా కయ్యానికి కాలు దువ్వింది పాకిస్తాన్. ఫలితంగా ఇరు దేశాలు పరస్పరం దాడులకు దిగాయి. ఆప్ఘాన్పై పాక్ దాడి చేయగా.. పాక్పై ఆప్ఘాన్ కౌంటర్ ఎటాక్ చేసింది. ఈ దాడుల్లో ఇరుదేశాలు భారీగా ప్రాణ నష్టం చవిచూశాయి. పాక్ తీరుపై తీవ్ర ఆగ్రహంతో ఉన్న ఆప్ఘాన్లోని తాలిబన్ ప్రభుత్వం దాయాది దేశానికి తగిన బుద్ధి చెప్పాలని చూస్తోంది.
ఈ క్రమంలోనే ఇండియా బాటలో నడిచేందుకు సిద్ధమైంది. ఇండియా సిందూ నది జలాల ఒప్పందం రద్దు చేసిన మాదిరిగానే పాక్పై నీటి ఆంక్షలు విధించి దెబ్బకొట్టాలని ఆప్ఘాన్ భావిస్తోంది. ఈ మేరకు తాలిబన్ సుప్రీం లీడర్ మౌలావి హిబతుల్లా అఖుంద్జాదా కీలక నిర్ణయం తీసుకున్నారు. కునార్ నదిపై ఆనకట్టల నిర్మాణాన్ని వీలైనంత త్వరగా ప్రారంభించి పాకిస్తాన్‌కు నీటిని పరిమితం చేయాలని ఆఫ్ఘన్ జల, ఇంధన మంత్రిత్వ శాఖను ఆయన ఆదేశించారు.
ఈ విషయాన్ని ఆప్ఘాన్ జల, ఇంధన మంత్రిత్వ శాఖ గురువారం (అక్టోబర్ 23) సోషల్ మీడియా వేదికగా వెల్లడించింది. ‘‘కునార్ నదిపై ఆనకట్టల నిర్మాణాన్ని వీలైనంత త్వరగా ప్రారంభించి నది నీటిని పాక్కు పరిమితం చేయాలని అలాగే దేశీయ కంపెనీలతో ఒప్పందాలు కుదుర్చుకోవాలని సుప్రీం లీడర్ అఖుండ్జాదా ఆదేశించారు’’ అని జల, ఇంధన మంత్రిత్వ శాఖ స్పష్టం చేసింది.
కాగా, సిందూ నది జలాల ఒప్పందం రద్దుతో ఇప్పటికే నీటి సంక్షోభంతో అల్లాడిపోతున్న పాకిస్తాన్.. తాజాగా ఆప్ఘాన్ తీసుకున్న నిర్ణయంతో ఏడారిగా మారే అవకాశం ఉందని నిపుణులు అభిప్రాయపడుతున్నారు. ఇటు ఇండియా.. అటు ఆప్ఘాన్ రెండు వైపులా నుంచి నీళ్లు బంద్ అయితే.. పాక్ నీళ్లు లేక గిలగిలకోట్టుకోవాల్సి వస్తోంది.
కునార్ నది వివరాలు:
480 కి.మీ పొడవున్న కునార్ నది ఈశాన్య ఆఫ్ఘనిస్తాన్‌లోని హిందూ కుష్ పర్వతాలలో పాకిస్తాన్ సరిహద్దుకు దగ్గరగా ఉన్న బ్రోగిల్ పాస్ సమీపంలో జన్మిస్తుంది. ఈ నది కునార్, నంగర్హార్ ప్రావిన్సుల గుండా దక్షిణం వైపు ప్రవహించి పాకిస్తాన్‌లోని ఖైబర్ పఖ్తుంఖ్వా ప్రావిన్స్లోకి ప్రవహిస్తుంది. అక్కడి నుంచి జలాలాబాద్ నగరానికి సమీపంలో కాబూల్ నదిలో కలుస్తుంది. కాబూల్ నది అటాక్ సమీపంలో సింధు నదిలో కలుస్తుంది. ఖైబర్ పఖ్తుంఖ్వా ప్రావిన్స్‌కు ఈ నది చాలా ముఖ్యమైనది. కునార్ నది నీటి ప్రవాహం తగ్గడం సింధు నదిపై తీవ్ర ప్రభావాన్ని చూపుతుంది. తద్వారా పంజాబ్‌ను కూడా దెబ్బతీస్తుంది.
