అగ్నిపథ్ పథకం నేపథ్యంలో దేశంలోని పలు ప్రాంతాల్లో ఆర్మీ అభ్యర్థులు చేపట్టిన నిరసనల గురించి అందరికీ తెలిసిందే. ఇదే తరహాలో సికింద్రాబాద్ రైల్వే స్టేషన్ లోనూ పలు రైళ్లను తగలబెట్టిన యువత... తీవ్ర ఆందోళన చేశారు. ఈ నేపథ్యంలో నిరసనలో పాల్గొని, అలజడులు సృష్టించిన వారిపై పోలీసులు చర్యలకు పూనుకున్నారు. అందులో భాగంగా ఇప్పటికే చాలా మంది యువకులను ప్రశ్నిస్తున్నట్టు తెలుస్తోంది. అయితే ఈ ఘటనలో పాల్గొ్న్న జనగాం జిల్లా స్టేషన్ ఘనపూర్ కు చెందిన గోవింద్ అజయ్ అనే యువకుడు తాజాగా ఆత్మహత్య చేసుకునేందుకు ప్రయత్నించాడు. ఈ అల్లర్లలో భాగంగా ఒక టీవీ ఛానల్ లో మాట్లాడిన అజయ్... తన మీద పోలీసులు కేసు నమోదు చేస్తారేమో అన్న భయంతోనే ఆత్మ హత్య యత్నానికి పాల్పడినట్టు సమాచారం. వెంటనే ఈ యువకున్ని వరంగల్ ఎంజీఎంకు తరలించగా... ప్రస్తుతం వైద్యులు చికిత్స అందిస్తున్నట్టు తెలుస్తోంది.
