హైదరాబాద్, వెలుగు: అన్నపూర్ణ స్టూడియోను ఫ్యూచర్ సిటీకి తీసుకొస్తామని సినీ నటుడు అక్కినేని నాగార్జున ప్రకటించారు. ఫ్యూచర్ సిటీలో నిర్వహించిన తెలంగాణ గ్లోబల్ రైజింగ్ సమిట్లో పాల్గొన్న అనంతరం ఆయన మీడియాతో మాట్లాడారు. తెలంగాణ ప్రభుత్వ విజన్ ఎంతో బాగుందని కొనియాడారు. ఈ ప్రాంతంలో ఫిల్మ్ హబ్ ఏర్పాటు చేయాలని ప్రభుత్వం భావిస్తోందని చెప్పారు. అజయ్ దేవ్గణ్లాంటి వాళ్లు ఇక్కడ ఫిల్మ్ సిటీని ఏర్పాటు చేయాలనుకోవడం గొప్ప విషయమని ఆయన పేర్కొన్నారు.
అట్టహాసంగా ‘గాలా’ డిన్నర్
అతిథుల కోసం ప్రశాంతమైన వాతావరణంలో, సంగీత విభావరితో కూడిన గాలా డిన్నర్ను ప్రభుత్వం ఏర్పాటు చేసింది. ప్రత్యేకంగా ఏర్పాటు చేసిన వేదికపై మ్యూజికల్ కాన్సెప్ట్స్ ప్రదర్శించారు. ప్రముఖ మ్యూజిక్ డైరెక్టర్ ఎం.ఎం కీరవాణి పాటలతో అలరించారు. ఇందులో విదేశీ ప్రతినిధులు, దేశీయ ప్రముఖులు, వివిధ కంపెనీల సీఈఓలు పాల్గొన్నారు .
తెలంగాణ రైజింగ్పై సరికొత్త పాట
తెలంగాణ రైజింగ్ థీమ్పై ప్రభుత్వం రూపొందించిన సరికొత్త పాటను ఆవిష్కరించారు. ‘తెలంగాణ రైజింగ్..స్టేట్ ఈజ్ సో షైనింగ్.. ద ఫ్యూచర్ ఈజ్ బిల్డింగ్..’ అంటూ సాగే ఈ పాటలో తెలంగాణ టూరిజం, పరిశ్రలు, భారత్ ఫ్యూచర్ సిటీ, గేట్ వే ఆఫ్ హైదరాబాద్, ఉస్మానియా జనరల్ ఆసుపత్రి, యంగ్ ఇండియా స్కిల్ యూనివర్సిటీ అంశాలను పొందుపరిచారు.
