- ఏనుమాముల మార్కెట్లో ఆల్‍ టైం రికార్డ్ ధరలు
వరంగల్, కాశిబుగ్గ, వెలుగు : వరంగల్ ఏనుమాముల వ్యవసాయ మార్కెట్లో మిర్చి, పత్తికి మంగళవారం ఆల్‍ టైం రికార్డ్ ధరలు దక్కాయి. 50 వేలకు పైగా మిర్చి, పత్తి బస్తాలతో ఉదయం నుంచే యార్డ్ కళకళలాడింది. ఇందులో సింగిల్ పట్టి రకం మిర్చి క్వింటాల్కు రూ.40 వేలు, పత్తి క్వింటాల్కు రూ.10,100 పలికింది. దీంతో రాష్ట్రంలోనే తొలిసారి సరికొత్త రికార్డు నమోదైందని మార్కెటింగ్ శాఖ జేడీఎం మల్లేశం, మార్కెట్ సెక్రెటరీ బివి.రాహుల్ తెలిపారు. ఏనుమాముల వ్యవసాయ మార్కెట్కు యూఎస్‍–341, దేవునూర్‍ డిలక్స్ (డీడీ), 1048, తేజ, 334, వండర్‍ హాట్‍తో పాటు సింగిల్ పట్టి మిర్చిని రైతులు ఎక్కువగా తీసుకువస్తారు. ములుగు జిల్లా వెంకటాపూర్కు చెందిన రైతు సుధాకర్‍రావు మంగళవారం సింగిల్‍పట్టి రకానికి చెందిన 11 బస్తాలు తీసుకురాగా, రాజరాజేశ్వర చిల్లీస్ ఖరీదుదారుడు క్వింటాల్కు రూ.40 వేల చొప్పున కొన్నాడు. మిగతా మిర్చి రకాలతో పోలిస్తే..సింగిల్ పట్టి రకానికి ఇంటర్నేషనల్‍ మార్కెట్ ఎక్కువగా ఉంది. ఘాటు తక్కువగా ఉండే ఈ మిర్చి , స్వీటుగా ఉండడంతో ప్రముఖ కంపెనీలు సాస్‍, స్వీట్లలో ఉపయోగిస్తాయి. అందుకే ఈ స్థాయి డిమాండ్ ఉందని తెలుస్తోంది..
పత్తికి రూ.10,100
పత్తికి ప్రభుత్వ మద్దతు ధర క్వింటాల్కు రూ.6,025 ఉండగా, ఈ ఏడాది సీజన్ నుంచి పెరుగుతూ వస్తోంది. మొదట్లో రూ.8 వేలుండగా, మంగళవారం ఏనుమామూల మార్కెట్లో అత్యధికంగా రూ.10.100 పలికింది. ఇది కూడా స్టేట్ రికార్డు అని ఆఫీసర్లంటున్నారు. వరంగల్ జిల్లా గీసుగొండ మండలం ఎలుకుర్తికి చెందిన రైతు తిరుపతి 17 బస్తాల పత్తి మార్కెట్లోని జాజు ట్రేడర్స్కు తీసుకురాగా, విశ్వనాథ్ ట్రేడింగ్ కంపెనీ క్వింటాల్కు రూ.10,100 చొప్పున కొనుగోలు చేసింది.
