- 3 రోజుల పాటు ఉత్సవాలు
- వివిధ ప్రాంతాల నుంచి తరలిరానున్న భక్తులు
నస్రుల్లాబాద్, వెలుగు: నస్రుల్లాబాద్ మండలం బొమ్మన్దేవ్పల్లిలో కొండపై వెలసిన అల్లమ ప్రభువు జాతర ఈ నెల 9 నుంచి ప్రారంభం కానుంది.మూడు రోజుల పాటు జరిగే ఉత్సవాల్లో భాగంగా 9న అగ్ని గుండం, 10న నిండు జాతర, రథోత్సవం, 11న కుస్తీ పోటీలు నిర్వహిస్తారు. అల్లముడిని దర్శించుకునేందుకు మహారాష్ట్ర, కర్నాటకలతో పాటు ఆయా రాష్ట్రాల నుంచి ప్రజలు వస్తుంటారు.
దీంతో ఈ మూడు రోజుల పాటు బొమ్మన్దేవ్పల్లి భక్త జనంతో కిటకిటలాడనుంది. కర్నాటకలోని శివమొగ్గ జిల్లా శికారిపురి తాలూకాలోని బల్లిగావి అల్లమ ప్రభు జన్మస్థలం. అల్లముడు తన గురువు అనిమిషుడి ద్వారా పొందిన ఆత్మలింగాన్ని తీసుకొని దేశ సంచారం చేస్తూ మాఘ మాసంలోని అమావాస్య రోజున బొమ్మన్దేవ్ పల్లి గ్రామ కొండపై ప్రతిష్ఠించినట్లు స్థల పురాణం. అందుకే ఈ కొండకు అల్లమ ప్రభు కొండగా పేరొచ్చింది.
ఎప్పటికీ ఎండని కుంట..
అల్లమ ప్రభు మహిమతో కొండపైకి వెళ్లే దారిలో కుంటలో అన్ని కాలాల్లోనూ నీరు ఉంటుంది. ఈ నీటిని తీసుకొని కొండపై ఉన్న ఆత్మాలింగాన్ని పూజిస్తే కోరిన కొర్కెలు తీరుతాయని భక్తుల నమ్మకం. అల్లముడి శిష్యులైన బసవన్న, సిద్ధప్ప ఈ విషయాన్ని ప్రచారం చేశారు.
ఎస్సీలే పూజారులు
పూర్వం ఎస్సీలను ఆలయాల్లోకి అనుమతించేవారు కాదు. కానీ ఈ ఆలయంలో మాత్రం ఎస్సీ సామాజిక వర్గానికి చెందిన వారే పూజారులుగా కొనసాగుతుండడం విశేషం. ప్రస్తుతం అనిత, రాణి అనే మహిళలు పూజారులుగా
ఉన్నారు.
