కరాచీ: సమకాలీన క్రికెట్లో టీమిండియా కెప్టెన్ విరాట్ కోహ్లీని మించిన మొనగాళ్లు లేరని పాకిస్థాన్ మాజీ బ్యాట్స్మన్ అమీర్ సోహైల్ ప్రశంసలు కురిపించాడు. టీమ్మేట్స్లో స్ఫూర్తి నింపడంలో అతనికి ఎవరూ సాటిరారన్నాడు. తమ లెజెండరీ బ్యాట్స్మన్ జావేద్ మియాందాద్తో కోహ్లీకి చాలా పోలికలు ఉన్నాయన్నాడు. ‘ప్రస్తుత తరంలో కోహ్లీ గ్రేట్ ప్లేయర్. అతడి చుట్టూ ఉండే ప్లేయర్లలో చాలా స్ఫూర్తి నింపుతాడు. గొప్ప క్రికెటర్లలో ఉండే గొప్పతనం ఇదే. లెజెండరీ క్రికెటర్గా మారాలంటే ఇలాంటి లక్షణాలు పుష్కలంగా ఉండాలి. క్రికెట్లో పేరుమోసిన ఆటగాళ్లు చాలా మంది ఉన్నారు. వ్యక్తిగతంగానూ గొప్ప ప్లేయర్లు చాలానే ఉన్నారు. కానీ వారి గొప్పతనం మాత్రం టీమ్కు ఉపయోగపడలేదు. ఓవరాల్గా వాళ్ల పెర్ఫామెన్స్ టీమ్కంటే వాళ్లకే ఎక్కువగా ఉపయోగపడింది. మా క్రికెట్ చరిత్రలో గొప్ప ప్లేయర్ మియాందాద్. తన చుట్టు ఉండే ప్లేయర్ల స్థాయి మెరుగవ్వడానికి చాలా కృషి చేశాడు. అందుకే ఈ రోజుల్లో కూడా అతని పేరును గుర్తు చేసుకుంటున్నాం. అతనితో కలిసి ఎక్కువ కాలం పని చేస్తే చాలా నేర్చుకోవచ్చు. మనం కూడా మెరుగవ్వాలనే స్ఫూర్తి కలుగుతుంది. కోహ్లీ కూడా ఇప్పుడు అదే పని చేస్తున్నాడు. తనతో పాటు చుట్టూ ఉండే టీమ్మేట్స్ను కూడా మెరుగుపరుస్తాడు. అందుకే అతనికి గ్రేట్ ప్లేయర్ అనే ట్యాగ్ వచ్చింది’ అని సోహైల్ పేర్కొన్నాడు. కోహ్లీ గ్రేట్ ప్లేయర్ అని చెప్పడానికి చాలా కారణాలున్నాయన్నాడు. బ్యాటింగ్ తీరు, దూకుడు, మైదానంలో ప్రవర్తన విరాట్ను ఉన్నత స్థానంలో నిలబెట్టాయన్నాడు. ప్రొఫెషనల్ కెరీర్కు, పర్సనల్ లైఫ్కు సేమ్ ఇంపార్టెన్స్ ఇస్తాడని కితాబిచ్చాడు.
బాబర్ చాలా నేర్చుకోవాలి
క్రికెట్లో కోహ్లీలా ఎదగాలంటే పాక్ కెప్టెన్ బాబర్ ఆజమ్ చాలా నేర్చుకోవాలని సోహైల్ అన్నాడు. ‘బాబర్లో కొన్ని మంచి లక్షణాలు ఉన్నాయి. టాలెంట్ బాగానే ఉంది. బాగా ఆడాలనే తపన, ఆసక్తి కూడా ఎక్కువే. కానీ టీమ్మేట్స్తో ఉండాల్సిన తీరులో చాలా మార్పులు రావాలి. వాళ్లకు అవసరమైనప్పుడు సూచనలు, సలహాలు ఇవ్వాలి. తనను చూసి స్ఫూర్తి పొందేలా కొన్ని విషయాల్లో ముందుండాలి. మాకు ఒకడున్నాడనే నమ్మకం వాళ్లలో కలిగించాలి. అందుకు అతను బాగా కష్టపడాలి.’ అని సోహైల్ సలహాలు ఇచ్చాడు. టీమిండియా డ్రెస్సింగ్ రూమ్లో ఉండే వాతావరణం పాక్ క్రికెట్లోనూ ఉంటే బాగుంటుందన్నాడు. దీనిని నెలకొల్పడానికి బాబర్ కృషి చేయాలని సోహైల్ పేర్కొన్నాడు.