బరువు తగ్గడానికి, కండరాల బలానికి, రక్తంలోని షుగర్ లెవల్స్ని కంట్రోల్ చేయడానికి, రోగ నిరోధక శక్తికి, ఆరోగ్యమైన చర్మం కోసం.. ఇలా మరెన్నింటికో ప్రొటీన్ అవసరం. ఇది ఫుడ్లో సరిపడా దొరుకుతున్నప్పటికీ.. చాలామంది ముఖ్యంగా జిమ్ చేసేవాళ్లు ప్రొటీన్ షేక్స్ వైపే చూస్తున్నారు. మరి ఇవి ఆరోగ్యానికి మంచివేనా? ప్రొటీన్ ఫుడ్ కంటే శరీరానికి మేలు చేస్తాయా? అంటే కాదంటుంది న్యూట్రిషనిస్ట్ దీప్తి లోకేశప్ప.
మోతాదు మించితే..
ప్రొటీన్ షేక్స్ తాగడం వల్ల చాలాసేపటి వరకు కడుపునిండుగా ఉంటుంది. దానివల్ల త్వరగా ఆకలి వేయదు. ఫలితంగా బరువు తగ్గడం ఈజీ అవుతుంది. వర్కవుట్స్ తర్వాత ప్రొటీన్ షేక్స్ తాగితే ఇన్స్టంట్ ఎనర్జీ వస్తుందనేది కొందరి మాట. అలాగే ప్రొటీన్ షేక్స్, సప్లిమెంట్స్ తీసుకోవడం వల్ల కండరాలు బలపడతాయి. పైగా వీటిని తేలిగ్గా తీసుకోవచ్చు అన్న ఆలోచనతో చాలామంది వీటికి అలవాటు పడుతున్నారు. మరి, ఇవి ప్రొటీన్ ఫుడ్ కన్నా బెటర్ ఆప్షనా అంటే కాదు. అందుకే ఎప్పుడో ఒకసారి అయితే ఒకే. కానీ, ప్రొటీన్ కోసం పూర్తిగా వీటిపైనే ఆధారపడకూడదు. హెల్దీ ప్రొటీన్ కేవలం ఫుడ్ ద్వారానే అందుతుందని గుర్తుంచుకోవాలి. అలాగే ప్రొటీన్ షేక్స్ని ఎక్కువగా తాగడం వల్ల యాక్నె సమస్యలొస్తాయి స్టడీలు చెప్తున్నాయి. వీటిల్లో లాక్టోఫెరిన్ అనే యాంటీ బ్యాక్టీరియల్ ఉంటుంది. ఇది జీర్ణక్రియలో ఇబ్బందికి కారణం అవుతుంది. అలాగే మార్కెట్లో ఉన్న చాలా ప్రొటీన్ పౌడర్స్ తయారీలో కాడ్మియం, ఆర్సెనిక్, మెర్క్యురీ లాంటి హానికారక కెమికల్స్ ఉన్నాయి. ఇవి తలనొప్పి , కండరాలు, కీళ్ల నొప్పులు, మలబద్ధకం లాంటి సమస్యలు తెచ్చిపెడతాయి. అన్నింటికి మించి వర్కవుట్ చేసిన వెంటనే ప్రొటీన్ షేక్స్ తాగితే ఇన్సులిన్ శాతం పెరుగుతుంది. అందుకే నేచురల్గా దొరికే ఫుడ్ ద్వారానే శరీరానికి ప్రొటీన్ ఇవ్వాలి. అందుకోసం ఇవి తినాలి.
రోజూ ఇవి తినాలి
- వంద గ్రాముల చికెన్లో దాదాపు ఇరవై గ్రాముల ప్రొటీన్ ఉంటుంది. రోజుకొక ఉడకబెట్టిన గుడ్డు తింటే ప్రొటీన్తో పాటు శరీరానికి అవసరమయ్యే అమైనో యాసిడ్స్ కూడా అందుతాయి. అలాగే ఒక కేజీ సాల్మన్ చేపల్లో దాదాపుగా 200 గ్రాముల ప్రొటీన్తో పాటు ఒమెగా– 3 ఫ్యాటీ యాసిడ్స్ కూడా పుష్కలంగా ఉంటాయి.
- పల్లీలు, పీనట్ బటర్, బాదం, వాల్నట్స్, జీడిపప్పు , నువ్వులు, చియా సీడ్స్ , అవిసెలు, పాలు, ఆకుకూరలు రెగ్యులర్ డైట్లో చేర్చాలి.
