- పీడీఎస్యూ ఆధ్వర్యంలో సబ్ కలెక్టర్ కు వినతిపత్రం అందజేత
ఆర్మూర్, వెలుగు : మెండోరా మండలం పోచంపేట్ గ్రామంలోని సోషల్ వెల్ఫేర్ రెసిడెన్షియల్లో 8వ తరగతి చదువుతున్న సాయి లిఖిత మృతిపై సమగ్ర విచారణ జరిపించాలని పీడీఎస్యూ ఆర్మూర్ ఏరియా కమిటీ ఆధ్వర్యంలో శుక్రవారం ఆర్మూర్ సబ్ కలెక్టర్ అభిజ్ఞాన్ మాల్వియాను కలిసి వినతిపత్రం అందజేశారు. అనంతరం పీడీఎస్యూ జిల్లా అధ్యక్షుడు ఎం.నరేందర్ వారి కుటుంబ సభ్యులతో కలిసి మాట్లాడుతూ సాయి లిఖిత హాస్టల్లో అనారోగ్యంతో బాధపడుతున్నా ఇన్చార్జి ప్రిన్సిపాల్, సిబ్బంది పట్టించుకోకపోవడం వల్లే ఆమె మృతి చెందిందని ఆరోపించారు.
తీవ్ర అస్వస్థతకు గురైన తర్వాత సమాచారం ఇవ్వడంతో నిర్మల్ హాస్పిటల్ లో చేర్పించగా డెంగ్యూ సోకిందని హాస్పిటల్లో రిపోర్ట్ ఇచ్చారని, అక్కడి నుంచి మెరుగైన వైద్యం కోసం హైదరాబాద్ తరలించగా అక్కడ మృతి చెందిందని తెలిపారు. స్టూడెంట్ మృతికి కారణమైన వారిపై కఠిన చర్యలు తీసుకోవాలని డిమాండ్ చేశారు. బాధిత కుటుంబానికి రూ. 50 లక్షల ఎక్స్ గ్రేషియా చెల్లించాలని, బాధిత కుటుంబంలో ఒకరికి అర్హతకు తగ్గట్టు ప్రభుత్వ ఉద్యోగం ఇవ్వాలని డిమాండ్ చేశారు. కార్యక్రమంలో పీడీఎస్యూ ఆర్మూర్ ఏరియా అధ్యక్ష కార్యదర్శులు నిఖిల్ రాజు, విద్యార్థి తల్లిదండ్రులు లింగన్న, లక్ష్మి , మామయ్య సాయినాథ్ తదితరులు పాల్గొన్నారు.
