న్యూఢిల్లీ,వెలుగు: అయ్యప్ప భక్తులు ఇరుముడి (కొబ్బరికాయతో సహా) ని చేతపట్టుకొని విమాన ప్రయాణం చేసేలా కేంద్రం నిర్ణయం తీసుకుంది. ఈ మేరకు శుక్రవారం పౌర విమానయాన శాఖ మంత్రి రామ్మోహన్ నాయుడు ఒక వీడియో విడుదల చేశారు. శబరిమల వెళ్లే భక్తులు ఇరుముడిని చేతి సామానుగా తీసుకెళ్లే ప్రత్యేక సడలింపు జనవరి 20 వరకు దేశవ్యాప్తంగా అమల్లో ఉంటుందని ఆయన తెలిపారు.
అయ్యప్ప భక్తులు ఎయిర్పోర్టు భద్రతా సిబ్బందికి సహకరించాలని, మార్గదర్శకాలు తప్పనిసరిగా పాటించాలని సూచించారు. ఇరుముడి స్క్రీనింగ్, తనిఖీ ప్రక్రియల విషయంలో అధికారుల సూచనలను అనుసరించాలని కోరారు. ‘‘స్వామియే శరణం అయ్యప్ప! శబరిమల పవిత్ర యాత్రలో పాల్గొనే అయ్యప్ప భక్తుల సౌలభ్యం కోసం ఇరుముడికి ఉన్న పవిత్రత, భావోద్వేగాల్ని గౌరవిస్తూ, భక్తులు ఇరుముడిని తమతో పాటు నేరుగా విమాన ప్రయాణంలో తీసుకెళ్లేందుకు అనుమతిస్తున్నం.
భద్రతా ప్రమాణాలను అమలు చేస్తూనే భక్తుల సంప్రదాయాలు, ఆచారాలకు భంగం కలగకుండా ఈ నిర్ణయం తీసుకున్నాం. మన దేశం గర్వించే సాంస్కృతిక విలువలు, సంప్రదాయాలు, భక్తి స్ఫూర్తిని నిలబెట్టే దిశగా మా నిబద్ధతను ఈ నిర్ణయం ప్రతిబింబిస్తుంది. ప్రతి భక్తుడికి సౌలభ్యం, గౌరవం, ఆత్మగౌరవం కల్పించడం మా ప్రభుత్వ ధ్యేయం’’ అని రామ్మోహన్ నాయుడు పేర్కొన్నారు.
భద్రతా నియమావళి ప్రకారం ఇరుముడిని తప్పనిసరిగా చెకిన్ లగేజీగా మాత్రమే విమానాల్లో అనుమతిస్తున్నారు. ఈ క్రమంలో విమానాల్లో చెకిన్ లగేజీగా ఇరుముడిని తీసుకెళ్లాల్సి రావడంతో భక్తులు కొంత అసౌకర్యానికి గురయ్యేవారు. భక్తుల విశ్వాసాలను పరిగణనలోకి తీసుకొని ఇరుముడిని చేతబట్టుకునే విమానంలో ప్రయాణించే వెసులుబాటు కల్పించడంపై అయ్యప్ప భక్తులు సంతోషం వ్యక్తం చేస్తున్నారు.
