- సర్పంచులకు తెలియకుండా నిధులు డ్రా చేశారు: బండి సంజయ్
హైదరాబాద్, వెలుగు: సర్పంచ్లు, ఉప సర్పంచులకు తెలియకుండా రాష్ట్ర ప్రభుత్వం, పంచాయతీ రాజ్ శాఖ అధికారులు వారి బ్యాంకు ఖాతాల డిజిటల్ కీ ఆధారంగా 15వ ఆర్థిక సంఘం నిధులను విత్ డ్రా చేశారని బీజేపీ రాష్ట్ర అధ్యక్షుడు, ఎంపీ బండి సంజయ్ ఆరోపించారు. నిబంధనలకు విరుద్ధంగా పాత బకాయిలు చెల్లించేందుకు ఆ నిధులు వినియోగించారని ఆయన పేర్కొన్నారు.
నిధుల దుర్వినియోగం జరిగిందని, దానిపై ఎంక్వైరీ చేసి చర్యలు తీసుకోవాలని ఆయన కోరారు. ఈ మేరకు కేంద్ర గ్రామీణాభివృద్ధి, పంచాయతీ రాజ్ మంత్రి గిరిరాజ్ సింగ్ కు సంజయ్ మంగళవారం లెటర్ రాశారు. కొన్ని రోజుల క్రితం 15వ ఆర్థిక సంఘం రాష్ట్రంలోని గ్రామ పంచాయతీలకు ఫండ్స్ విడుదల చేసిందన్నారు.
‘‘పంచాయతీరాజ్ చట్టం ప్రకారం ఆ డబ్బును డ్రా చేసి, ఆయా గ్రామ పంచాయతీలోని సంక్షేమం, అభివృద్ధి కార్యక్రమాలకు వినియోగించే అధికారం సర్పంచులకు మాత్రమే ఉంటంది. గ్రామ పంచాయతీ కమిటీ తీర్మానం ఆధారంగా వారికి ఆ డబ్బును డ్రా చేసే అధికారం ఉంటది. 50 శాతం నిధులు రహదారుల నిర్మాణానికి, మిగిలిన 50 శాతం నిధులు సంక్షేమం, నిర్వహణకు వెచ్చించాలి. అయితే ఆ నిధులను సర్పంచ్లకు తెలియకుండానే అధికారులు వాడుకున్నారు. ఈ విషయమై తెలంగాణలో అన్ని ప్రాంతాలకు చెందిన సర్పంచులు నన్ను కలిసి, నిధులు తిరిగి తమ ఖాతాలో జమయ్యేలా చర్యలు తీసుకోవాలని వినతిపత్రం సమర్పించారు” అని సంజయ్ ఆ లేఖలో పేర్కొన్నారు.
