ప్రపంచవ్యాప్తంగా పాపులారిటీ ఉన్న బార్బీ కంపెనీ రకరకాల బొమ్మల్ని చేస్తుందనేది తెలిసిన విషయమే! పిల్లలను ఆకర్షించేందుకు డాక్టర్ బార్బీ, కిచెన్ బార్బీ, అథ్లెట్ బార్బీ వంటి రకరకాల బొమ్మలను మార్కెట్లోకి తెస్తోంది. అలాగే అప్పుడప్పుడూ ప్రముఖ వ్యక్తుల గౌరవ సూచకంగా బొమ్మలను డిజైన్ చేసి, వారికి అందిస్తుంది. ఇప్పుడు ఆస్ర్టాజెనికా కొవిడ్ వాక్సిన్ తయారీలో ఉన్న ఆరుగురి టీమ్లో ఒకరైన బ్రిటన్ సైంటిస్ట్ సారా గిల్బర్ట్ మోడల్ బొమ్మను బార్బీ కంపెనీ డిజైన్ చేసింది.
గతంలో బార్బీ కంపెనీ... నటి మార్లిన్ మాన్రో, అమెరికా ఫేమస్ సింగర్ బియోన్స్, అమెరికా పొలిటిషియన్ ఎలియనోర్ రూజ్‌‌‌‌వెల్ట్‌ వంటి ప్రముఖుల బొమ్మలు తయారు చేసింది. ఇప్పుడు బ్రిటన్కు కొవిడ్ వ్యాక్సిన్ అందించటంలో కీలకంగా పని చేసి, ఆస్ట్రాజెనికా టీకాను తయారు చేసిన గిల్బర్ట్ ఈ ప్రశంసలు అందుకుంది.
ఆక్స్‌‌ఫర్డ్ యూనివర్సిటీలో గిల్బర్ట్ ప్రొఫెసర్ గా పని చేస్తోంది. అలాగే ఆక్స్‌‌ఫర్డ్ వ్యాక్సిన్ తయారు చేసిన ఆరుగురు విమెన్ టీమ్లో గిల్బర్ట్ కూడా ఉన్నారు. కొవిడ్ను బారి నుంచి ప్రజలను రక్షించడంలో మహిళగా తన పాత్రను ఆమె గర్వంగా చెప్పుకుంటారు ‘సైన్స్‌‌లో కెరీర్‌ గురించి అమ్మాయిలు చాలా తక్కువ మంది ఆలోచిస్తారనే మాటల్ని తప్పని నిరూపించడానికే నేను కష్టపడుతున్న’ అంటారామె. దీంతో ఆమెను స్ఫూర్తిగా తీసుకున్న బార్బీ గిల్బర్ట్ మోడల్ను తయారు చేసింది. పొడవైన జుట్టు, నలుపు రంగు కళ్లద్దాలు, నేవీ బ్లూ సూట్, వైట్ బ్లౌజ్తో బార్బీ బొమ్మ ఉంటుంది. ‘నా పోలికలో బార్బీ బొమ్మ డిజైన్ చేయడం హ్యాపీగా ఉంది’ అని గిల్బర్ట్ చెబుతోంది. ఈ మోడల్ బొమ్మ సైన్స్ రంగంలో పిల్లలకి ఆసక్తి కలిగేలా చేస్తుందని బార్బీ కంపెనీ చెప్పింది.
