- మధ్యాహ్నం ఒంటిగంట నుంచి రాత్రి 7 వరకు కొనసాగిన ర్యాలీ
- స్వచ్ఛందంగా తరలి వచ్చిన వేలాది మంది జనం
- జై కాంగ్రెస్, జై వివేక్ నినాదాలతో మార్మోగిన చెన్నూర్
కోల్బెల్ట్, వెలుగు: చెన్నూరు నియోజకవర్గంలో సోమవారం కాంగ్రెస్ నేత, పెద్దపల్లి మాజీ ఎంపీ డాక్టర్ జి. వివేక్ వెంకటస్వామి ఆధ్వర్యంలో నిర్వహించిన ఎన్నికల ప్రచార బైక్ ర్యాలీ సక్సెస్ కావడంతో ఆ పార్టీలో జోష్ నెలకొంది. మధ్యాహ్నం ఒంటిగంటకు జైపూర్ మండలం ఇందారంలో మొదలైన ర్యాలీ ఇందారం క్రాస్ రోడ్, రసూల్ పల్లి, జైపూర్, భీమారం, కిష్టంపేట మీదుగా సాయంత్రం 6 గంటలకు చెన్నూరుచేరుకుంది.
మార్గంమధ్యలో ఆయా గ్రామాల ప్రజలు వివేక్ వెంకటస్వామి, మాజీ ఎమ్మెల్యే నల్లాల ఓదెలు, వివేక్వెంకటస్వామి తనయుడు వంశీకృష్ణకు అడుగడుగునా ఘన స్వాగతం పలికారు. చెన్నూరులోనూ జిన్నింగ్ మిల్లు వద్ద స్వాగతం పలికి గజమాలతో సత్కరించారు. అనంతరం బస్టాండ్, అంబేద్కర్ చౌక్ మీదుగా పాత ఎమ్మార్వో ఆఫీస్వరకు ర్యాలీ కొనసాగింది. ఉదయం నుంచి సాయంత్రం 7 గంటల వరకు జనం తమ ప్రియతమ నేత వెంటే ఉండి జేజేలు పలికారు.
5వేలకు పైగా బైకులు, వేలాది మంది జనంతో సాగిన ర్యాలీ విజయోత్సవ సంబురాలను తలపించింది. ప్రచారంలో టీజేఎస్ అధ్యక్షుడు ప్రొఫెసర్ కోదండరాం, అడ్వకేట్ శరథ్, కాంగ్రెస్ లీడర్లు మూల రాజిరెడ్డి, పాపిరెడ్డి, ఐత హిమవంత రెడ్డి, సీనియర్ జర్నలిస్ట్ విఠల్, బాపిరెడ్డి, ఫయాజ్, చేకుర్తి సత్యనారాయణ రెడ్డి, శ్రీనివాస్ రెడ్డి, పోటు రామరెడ్డి, చల్లా రాంరెడ్డి, మైదం రవి, కళావతి తదితరులు పాల్గొన్నారు.
