హనుమకొండ, వెలుగు: హ్యాండిల్ లాక్ వేయని బైక్లను చోరీ చేస్తున్న ముగ్గురు వ్యక్తులను వరంగల్ టాస్క్ ఫోర్స్, స్టేషన్ ఘన్పూర్ పోలీసులు అరెస్ట్ చేశారు. వారి నుంచి రూ.12 లక్షల విలువైన 12 బైకులు, మూడు సెల్ ఫోన్లు స్వాధీనం చేసుకున్నారు. ఈ అరెస్ట్ కు సంబంధించిన వివరాలను వరంగల్ పోలీస్ కమిషనర్ డా.తరుణ్ జోషి మంగళవారం వెల్లడించారు. వరంగల్ జిల్లా వర్ధన్నపేటకు చెందిన ఉడట హరీశ్, రాయపర్తికి చెందిన వొల్లెల సుధాకర్, బొమ్మెర కిరణ్ ముగ్గురు దోస్తులు. వీరు జల్సాలకు అలవాటుపడి బైక్ చోరీలు మొదలుపెట్టారు. హరీశ్ గత నెలలో స్టేషన్ ఘన్ పూర్ పరిధిలో నాలుగు.. పాలకుర్తి, మాదాపూర్ స్టేషన్ల పరిధిలో రెండు, సుబేదారి, జీఆర్పీ కాజీపేట, భువనగిరి స్టేషన్ల పరిధిలో ఒక్కో బైక్ చోరీ చేశాడు.
వీటిని కిరణ్, సుధాకర్ మార్కెట్లో అమ్మకానికి పెట్టేవారు. ఇలా చీకటి దందా సాగిస్తుండగా.. వరంగల్ టాస్క్ ఫోర్స్ పోలీసులకు సమాచారం అందింది. దీంతో నిందితుల కదలికలపై పోలీసులు నిఘా పెట్టారు. మంగళవారం నెంబర్ ప్లేట్ లేని బండిపై వస్తుండగా.. స్టేషన్ ఘన్ పూర్ పోలీసులు పట్టుకుని విచారించారు. దీంతో అసలు నిజాన్ని నిందితులు ఒప్పుకోగా.. వారి ఇండ్లలో తనిఖీలు చేపట్టి చోరీ చేసిన బైకులను స్వాధీనం చేసుకున్నారు. టాస్క్ ఫోర్స్ అడిషనల్ డీసీపీ వైభవ్ గైక్వాడ్, ఏసీపీ జితేందర్ రెడ్డి, సీఐలు నరేష్ కుమార్, వెంకటేశ్వర్లు, ఎస్సై లవన్ కుమార్ ను సీపీ డా.తరుణ్ జోషి అభినందించారు.
