న్యూఢిల్లీ: హైదరాబాద్కు చెందిన బయోలాజికల్–ఈ సంస్థ త్వరలో అందుబాటులోకి తీసుకురానున్న టీకా ధర ఒక్కో డోసు ధర రూ.150 దాకా ఉండొచ్చని ప్రభుత్వ వర్గాలు వెల్లడించాయి. ప్రస్తుతం క్లినికల్ ట్రయల్స్ లో ఉన్న ఈ వ్యాక్సిన్ అందుబాటులోకి వస్తే.. 30 కోట్ల డోసులను రిజర్వు చేసేందుకు అన్ని ఏర్పాట్లు చేసినట్లు తెలిపాయి. ఇందులో భాగంగా రూ.1,500 కోట్లను ముందుగా చెల్లిస్తున్నట్లు చెప్పాయి. వ్యాక్సిన్ను ఆగస్టు నుంచి డిసెంబర్ దాకా బయోలాజికల్--–ఈ సంస్థ తయారు చేసి, నిల్వ చేస్తుందని, వచ్చే కొన్ని నెలల్లోనే వ్యాక్సిన్ అందుబాటులోకి వస్తుందని కేంద్ర ఆరోగ్య శాఖ వెల్లడించింది.
ప్రస్తుతం మూడో దశ ట్రయల్స్
బయోలాజికల్–ఈ తయారు చేస్తున్న వ్యాక్సిన్ ప్రస్తుతం మూడో దశ క్లినికల్ ట్రయల్స్లో ఉంది. ఫస్ట్ ఫేజ్, సెకండ్ ఫేజ్ ట్రయల్స్లో మంచి ఫలితాలు వచ్చాయని ప్రభుత్వం ఓ ప్రకటనలో తెలిపింది. స్వదేశీ వ్యాక్సిన్ తయారీదారులను ప్రోత్సహించడానికి ప్రభుత్వం చాలా ప్రయత్నిస్తోందని, ఇందులో భాగంగానే రీసెర్చ్, అభివృద్ధి, ఖర్చు కోసం సాయాన్ని అందిస్తున్నామని చెప్పింది. ఐదు లేదా ఆరు కొత్త కరోనా వ్యాక్సిన్లను సపోర్టు చేసేందుకు ప్రభుత్వం చేపట్టిన మిషన్లో ఇది ఓ భాగమని పేర్కొంది. బయోలాజికల్–ఈ సంస్థకు బయోటెక్నాలజీ డిపార్ట్‌‌మెంట్ ఇప్పటికే రూ.100 కోట్ల సాయం అందజేసిందని తెలిపింది. బయోలాజికల్-–ఈతో కలిసి పలు స్టడీలు చేసేందుకు భాగస్వామిగా ఉందని వెల్లడించింది.
‘జాన్సన్’తో బయోలాజికల్ ఒప్పందం
సొంతంగా టీకా తయారు చేసే పనిలో ఉన్న బయోలాజికల్–ఈ.. జాన్సన్ & జాన్సన్ సంస్థ వ్యాక్సిన్ ఉత్పత్తి చేసేందుకు కూడా ఒప్పందం చేసుకుంది. ఏడాదికి 60 కోట్ల వ్యాక్సిన్ డోసులను ప్రొడ్యూస్ చేసేందుకు సపరేట్ డీల్ కుదుర్చుకుంది. దేశంలో వ్యాక్సిన్ తయారీకి లైసెన్స్ పొందినట్లు కంపెనీ చెప్పింది.
