జూబ్లీహిల్స్, వెలుగు: కాలనీ సమస్యలపై నిలదీశారనే కక్షతో మేయర్ మనుషులు తనను కొట్టారని ఆరోపిస్తూ బీజేపీ నాయకురాలు పావని ఆత్మహత్యాయత్నం చేశారు. ఈ ఘటనపై బాధితురాలు బంజారాహిల్స్ పోలీసులకు గురువారం ఫిర్యాదు చేశారు. మేయర్ విజయలక్ష్మి ప్రాతినిధ్యం వహిస్తున్న బంజారాహిల్స్ లోని ఎన్బీటీ నగర్ బస్తీకి చెందిన 751 మంది యజమానులు ఓ వాట్సప్ గ్రూప్ పెట్టుకున్నారు. 4 రోజుల క్రితం లోకల్ బీజేపీ నాయకురాలు పావని తమ సమస్యలను పట్టించుకోవడం లేదంటూ మేయర్ లక్ష్యంగా విమర్శలు చేశారు. బస్తీని ఇలాగే వదిలేస్తే బంగ్లాదేశ్ గా మారుతుందని పోస్టు పెట్టారు. దీంతో గురువారం మేయర్అనుచరులు కొందరు పావని నివాసానికి వెళ్లి వాగ్వాదానికి దిగారు. ఆమెపై దాడి చేశారు. మనస్తాపం చెందిన ఆమె నిద్రమాత్రలు మింగి ఆత్మహత్యాయత్నం చేశారు.
