Blinkitలో GTA 6 గేమ్.. హైదరాబాద్ సహా ఈ 11 నగరాల్లో క్విక్ డెలివరీ 

Blinkitలో GTA 6 గేమ్.. హైదరాబాద్ సహా ఈ 11 నగరాల్లో క్విక్ డెలివరీ 

హైదరాబాద్: గేమింగ్ ప్రపంచం ఎంతో ఆసక్తిగా ఎదురుచూస్తున్న గ్రాండ్ థెఫ్ట్ ఆటో VI (GTA 6) రేపు (2026, నవంబర్ 19, గురువారం) విడుదల కానుండగా, ప్రముఖ క్విక్-కామర్స్ సంస్థ బ్లింకిట్ (Blinkit) గేమర్లకు అదిరిపోయే సర్‌ప్రైజ్ ఇచ్చింది. గేమ్ విడుదలకు ఒకరోజు ముందే (నవంబర్ 18, బుధవారం) బ్లింకిట్ యాప్‌లో GTA 6 ఆర్డర్లను ప్రారంభించింది. ఆర్డర్ చేసిన కేవలం కొన్ని నిమిషాల్లోనే గేమ్ బాక్స్‌ను ఇంటికి డెలివరీ చేస్తోంది. ఈ విషయాన్ని బ్లింకిట్ సీఈఓ అల్బిందర్ ధిండ్సా (Albinder Dhindsa) సోషల్ మీడియా వేదికగా అధికారికంగా ప్రకటించారు.

బాక్స్‌లో డిస్క్ ఉండదు.. మరి ఎలా ఆడాలంటే?: 

* బ్లింకిట్ ప్రస్తుతం PlayStation 5 (PS5) స్టాండర్డ్ ఎడిషన్ గేమ్‌ను ₹5,999 ధరకు విక్రయిస్తోంది. అయితే ఇందులో ఒక ప్రత్యేకత ఉంది. 

* డిజిటల్ డౌన్‌లోడ్ కోడ్: డెలివరీ చేసే ఫిజికల్ బాక్స్ లోపల సాధారణ గేమ్ డిస్క్ బదులుగా డిజిటల్ డౌన్‌లోడ్ కోడ్ (Digital Download Code) ఉంటుంది.

* ప్రీ-డౌన్‌లోడ్ సౌకర్యం: కస్టమర్లు ఈ కోడ్‌ను ప్లేస్టేషన్ స్టోర్‌లో (PlayStation Store) రిడీమ్ చేసుకుని, ఇప్పుడే గేమ్‌ను డౌన్‌లోడ్ చేసి పెట్టుకోవచ్చు. దీనివల్ల నవంబర్ 19వ తేదీ అర్ధరాత్రి గేమ్ అన్‌లాక్ అవ్వగానే ఏమాత్రం ఆలస్యం లేకుండా నేరుగా ఆడటం మొదలుపెట్టవచ్చు. పైగా ఈ ఫిజికల్ బాక్స్ గేమర్ల షెల్ఫ్‌లో ఒక కలెక్టబుల్ ఐటమ్‌లా (Collectible) నిలిచిపోతుందని ధిండ్సా పేర్కొన్నారు. 

సిక్ లీవ్స్ పెరుగుతాయేమో..- బ్లింకిట్ సీఈఓ ఫన్నీ ట్వీట్:

అల్బిందర్ ధిండ్సా తన పోస్ట్‌లో ఆసక్తికర వ్యాఖ్యలు చేశారు. GTA 6 విడుదల కావడానికి 13 ఏళ్లు పట్టింది. ఈ లోపు మేము మీకు నిమిషాల్లో గేమ్ డెలివరీ చేయడానికి బ్లింకిట్‌ను నిర్మించాం.. ఇప్పుడే ఆర్డర్ చేసి డౌన్‌లోడ్ చేసుకోండి. రాబోయే కొద్ది రోజుల్లో ఆఫీసుల్లో అనుమానాస్పదంగా సిక్ లీవ్స్ (Sick Leaves) భారీగా పెరిగే అవకాశం ఉందంటూ ఫన్నీగా ఓ ట్వీట్ చేశారు.

ప్రస్తుతం ఏయే నగరాల్లో అందుబాటులో ఉందంటే?

* మొదటి దశలో భాగంగా హైదరాబాద్ సహా దేశంలోని 11 ప్రధాన నగరాల్లోని ఎంపిక చేసిన ప్రాంతాల్లో బ్లింకిట్ ఈ డెలివరీని ప్రారంభించింది. 

* మెట్రో నగరాలు: హైదరాబాద్, బెంగళూరు, ముంబై, ఢిల్లీ, కోల్‌కతా, పుణె, అహ్మదాబాద్.

* ఎన్‌సీఆర్ ప్రాంతాలు: గురుగ్రామ్, ఫరీదాబాద్, ఘజియాబాద్, నోయిడా.

బ్లింకిట్‌లో 'GTA 6 అవుట్ ఆఫ్ స్టాక్: 

* ముంబై, బెంగళూరులో భారీ డిమాండ్ కారణంగా స్టాక్ అయిపోయింది అంటూ బ్లింకిట్‌ ఎక్స్ వేదికగా ప్రకటించింది.