హైదరాబాద్, వెలుగు: లోక్సభ ఎన్నికల షెడ్యూల్ విడుదల కావడంతో రాష్ట్రంలోనూ ఎలక్షన్ కోడ్ అమల్లోకి వచ్చింది. ఆన్ గోయింగ్ స్కీమ్స్ విషయంలో గత అసెంబ్లీ ఎన్నికల్లో ఎలాంటి నిబంధనలు వర్తించాయో ఇప్పుడు కూడా అవే వర్తిస్తాయని ఈసీ స్పష్టం చేసింది. ఆదివారం వరకు కొనసాగాల్సిన ధరణి స్పెషల్ డ్రైవ్కు ఎలక్షన్ కోడ్తో బ్రేక్ పడింది. అయితే, ధరణి ఇతర వ్యవహారాలన్ని ఎప్పటిలాగే కొనసాగుతాయని రెవెన్యూ శాఖ స్పష్టం చేసింది. మరోవైపు ఆర్టీసీ బస్సుల్లో మహిళలకు ఉచిత ప్రయాణం, రూ.500కు గ్యాస్ సిలిండర్, 200 యూనిట్లలోపు ఉచిత కరెంట్ గృహజ్యోతి గ్యారంటీలు అమల్లో ఉండనున్నాయి.
ఇందిరమ్మ ఇండ్లకు సంబంధించి లబ్ధిదారుల ఎంపిక పూర్తి కానుందన.. ఈ స్కీంపై ప్రభుత్వం ఎలక్షన్ కమిషన్ నుంచి క్లారిటీ తీసుకుని ముందుకు వెళ్లనున్నది. రైతుబంధు పథకం కింద యాసంగి పెట్టుబడి సాయం రైతుల ఖాతాల్లో ఇంకా పూర్తి స్థాయిలో జమ చేయలేదు. దాదాపు 10 శాత మంది రైతులకు రైతుబంధు ఇవ్వాల్సి ఉన్నట్టు తెలిసింది. గతంలో ఈ స్కీంకు ఈసీ బ్రేక్ వేసిన నేపథ్యంలో ఇప్పుడు కొనసాగింపు ఉంటుందా? లేదా? అనేదానిపైనా క్లారిటీ తీసుకోవాల్సి ఉంటుందని అధికారులు తెలిపారు. వేరే ఏ ఇతర పథకంపైనా కంప్లయింట్స్ ఉంటే ఈసీ ఆదేశాలకు తగ్గట్టుగా నడుచుకోవాల్సి ఉంటుందని రాష్ట్ర ప్రధాన ఎన్నికల అధికారి కార్యాలయ వర్గాలు వెల్లడించాయి. సీఈఓ వికాస్ రాజ్ జిల్లా కలెక్టర్లతో శనివారం సాయంత్రం వీడియో కాన్ఫరెన్స్ ద్వారా మాట్లాడారు. కోడ్ నేపథ్యంలో పలు కీలక సూచనలు చేశారు.
నిబంధనల ప్రకారం.. రూ.50 వేల కంటే ఎక్కువ నగదు తీసుకెళ్తే ఆధారాలు చూపించాల్సి ఉంటుందని, ప్రభుత్వ అధికారిక వెబ్ సైట్లలో రాజకీయ నాయకుల ఫొటోలు తొలగించాలని సూచించారు. ప్రభుత్వ, పబ్లిక్ ప్లేసుల్లో సర్కార్కు సంబంధించిన పథకాల హోర్డింగ్లు, బ్యానర్లు, ఫొటోలు తొలగించాలని ఆదేశాలు ఇ చ్చారు. మంత్రులు వారి కాన్వాయ్ వాహనాలను పార్టీ కార్యక్రమాలకు వాడుకోరాదని స్పష్టం చేశారు. బంగారం, ఇతర ఆభరణాలు భారీస్థాయిలో తీసుకెళ్లాలంటే తగిన ఆధారాలు, సర్టిఫికెట్లు చూపాల్సిందేనని స్పష్టం చేశారు. అత్యవసర వైద్యం, స్కూల్, కాలేజీ ఫీజులు, వ్యాపారం, శుభకార్యాలు, ఇతర అవస రాలకు అధిక మొత్తంగా నగదు తీసుకెళ్లే వారు సంబంధిత పత్రాలు దగ్గర పెట్టుకోవాలని సూచించారు.
ఏపీ, తెలంగాణలో ఒకేసారి పోలింగ్
గత లోక్సభ ఎన్నికల్లో తెలంగాణకు మొదటి ఫేజ్లో ఎన్నికలు నిర్వహించారు. ఆ తరువాత ఏపీలో అసెంబ్లీ, లోక్సభకు ఎన్నికలు జరిగాయి. అయితే ఈసారి రెండు తెలుగు రాష్ట్రాలకు ఒకే ఫేజ్(నాలుగో విడత)లో ఒకే తేదీన పోలింగ్ పెట్టా లని ఈసీ నిర్ణయించింది. కొందరికి ఏపీలో, ఇక్కడ రెండేసి ఓట్లు ఉన్నట్టు పలు కంప్లయింట్లు ఈసీకి అందాయి. ప్రధానంగా ఏపీ బార్డర్ జిల్లాలతో పాటు హైదరాబాద్లో ఉన్న ఏపీ సెటిలర్స్కు చాలా మందికి తెలంగాణతో పాటు ఏపీలోనూ ఓట్లు ఉన్నట్టు తెలిసింది. ఇదే విషయమై గతంలో కొందరు లీడర్లు ఈసీకి ఫిర్యాదు చేశారు. వాటన్నింటిని పరిగణనలోకి తీసుకున్న ఈసీ రెండు తెలుగు రాష్ట్రాలకు ఏక కాలంలో పోలింగ్ నిర్వహించేలా తేదీలు ప్రకటించినట్టు తెలిసింది.
రాష్ట్రంలో 3.29 కోట్ల మంది ఓటర్లు
రాష్ట్రంలో మొత్తం 3 కోట్ల 29 లక్షల 95 వేల 735 ఓటర్లు ఉన్నట్టు సీఈఓ వికాస్ రాజ్ వెల్లడించారు. ఇందులో పురుష ఓటర్లు కోటి 64 లక్షల 8 వేల 319 మంది ఉండగా.. మహిళా ఓటర్లు కోటి 65 లక్షల 84 వేల 687 మంది ఉన్నారు. ట్రాన్స్ జెండర్లు 2,729 మంది ఉన్నట్టు వికాస్రాజ్ తెలిపారు. మొత్తం ఓటర్లలో 96.67 శాతం మందికి ఓటరు ఐడీ కార్డులు అందజేసినట్టు ఒక ప్రకటనలో పేర్కొన్నారు. రాష్ట్రవ్యాప్తంగా 35,356 పోలింగ్ స్టేషన్లు ఉన్నట్టు తెలిపారు. వీటికి మరో 492 అనుబంధ పోలింగ్ స్టేషన్లు ఉన్నాయని చెప్పారు. ఒక్క పోలింగ్ స్టేషన్లో సుమారుగా 934 మంది ఓటర్లు ఉంటారని పేర్కొన్నారు.
