బీసీ రిజర్వేషన్లపై కాంగ్రెస్ ద్రోహం : ఎంపీ వద్దిరాజు రవిచంద్ర

• సీఎం రేవంత్ ​పులిపై స్వారీ చేస్తున్నరు.. ఇక దిగలేరు: ఎంపీ వద్దిరాజు రవిచంద్ర

హైదరాబాద్, వెలుగు: స్థానిక సంస్థలు, విద్య, ఉద్యోగాల్లో బీసీలకు 42 శాతం రిజర్వేషన్లు ఇస్తామని చెప్పిన కాంగ్రెస్​.. ఇప్పుడు పూర్తిగా ద్రోహం చేసిందని బీఆర్ఎస్​ ఎంపీ వద్దిరాజు రవిచంద్ర మండిపడ్డారు. ఎన్నికలకు ముందు కామారెడ్డి సభ వేదికగా కర్నాటక సీఎం సిద్ధరామయ్య చేతుల మీదుగా బీసీ డిక్లరేషన్​ను విడుదల చేయించారని.. కానీ, అధికారంలోకి వచ్చాక దానిని అమలు చేయకుండా మోసం చేశారని విమర్శించారు.

 శనివారం తెలంగాణ భవన్​లో మీడియాతో ఆయన మాట్లాడారు. బీసీ రిజర్వేషన్ల పెంపు పార్లమెంట్​లో చట్టం అయ్యాక.. రాజ్యాంగంలోని షెడ్యూల్​ 9లో చేర్చాకే సాధ్యమవుతుందని బీఆర్​ఎస్​ మొదటి నుంచీ చెప్తూనే ఉందన్నారు. బీసీ రిజర్వేషన్లకు కేసీఆర్​ మొదటి నుంచీ సానుకూలంగా ఉన్నారని.. చట్టసభల్లో మహిళలు, బీసీలకు 33 శాతం రిజర్వేషన్లు అమలు చేసేందుకు 2014  జూన్ 14న అసెంబ్లీలో తీర్మానం చేయించి కేంద్రానికి సిఫార్సు చేశారని గుర్తుచేశారు. 

బీసీ రిజర్వేషన్ల విషయంలో సీఎం రేవంత్​ పులిపై స్వారీ చేస్తున్నారని.. కిందకు దిగడం ఇక తేలిక కాదని తేల్చిచెప్పారు. ఎన్నికల్లో గెలిచేందుకు అలవిగాని హామీలిచ్చిన కాంగ్రెస్​ నాయకులు.. వాటిని నెరవేర్చలేక డైవర్షన్​ పాలిటిక్స్​ చేస్తున్నారని అన్నారు. కాంగ్రెస్​కు సొంతంగా 100 మంది.. ఆ పార్టీ నేతృత్వంలోని ఇండియా కూటమికి మొత్తంగా 250 మందికిపైగా ఎంపీలున్నారని.. అలాంటప్పుడు రాహుల్​ గాంధీ కేంద్రంపై ఒత్తిడి తెచ్చి బీసీ రిజర్వేషన్ల బిల్లును పార్లమెంటులో పెట్టించాలని డిమాండ్​ చేశారు. బీసీలకు మంచి చేయాలనే ఉద్దేశం కాంగ్రెస్​ నాయకులకు కొంచెం కూడా లేదన్నారు.