ములుగు, వెలుగు: ములుగు మండలం కాశిందేవిపేటలో 138 మంది రైతుల నుంచి వడ్లు కొని డబ్బులు ఇవ్వకుండా రూ.3కోట్లు టోకరా వేసి తప్పించుకు తిరుగుతున్న వ్యాపారి ఇబ్రహీం అలియాస్ జానీమియాను అదుపులోకి తీసుకున్నట్లు ఎస్పీ గాష్ ఆలం శుక్రవారం తెలిపారు. రైతుల ఫిర్యాదుతో ములుగు పోలీస్ స్టేషన్ లో నిరుడు కేసు నమోదైంది.
రైతులను నిలువునా ముంచి వివిధ జిల్లాల్లో పేరు మార్చుకొని మొబైల్ నంబర్ మార్చి తిరుగుతున్నాడు. పోలీసులు అతడి కదలికలపై నిఘా పెట్టి అరెస్ట్ చేశారు. ఇబ్రహీంను పట్టుకోవడంలో సీసీఎస్ సీఐ రవీందర్, ఏఎస్సై సుధీర్, సైబర్ క్రైమ్ కానిస్టేబుల్ జాహూర్, ఐటీకోర్ కానిస్టేబుల్ రాజేంద్రప్రసాద్, కానిస్టేబుల్ రఘు కృషి చేశారు. వీరికి ఎస్పీ గాష్ ఆలం రివార్డు అందించారు. త్వరలోనే మనీ రికవరీ చేసి రైతులకు అందించేందుకు చర్యలు తీసుకుంటామని ఎస్పీ వెల్లడించినట్లు రైతులు తెలిపారు.
