అందరికీ అవకాశాలు ఇచ్చే గడ్డ ఇది: నిక్కీ హేలీ

అందరికీ అవకాశాలు ఇచ్చే గడ్డ ఇది:  నిక్కీ హేలీ

వాషింగ్టన్: తాను భారత మూలాలున్న అమెరికా బిడ్డను అని చెప్పుకోవడానికి గర్వంగా ఉందని రిపబ్లికన్​ పార్టీ నేత నిక్కీ హేలీ అన్నారు. వివక్షకు తావు లేకుండా అందరికీ సమాన అవకాశాలు కల్పిస్తానని దేశ ప్రజలకు ఇచ్చిన  వాగ్దానాన్ని అమెరికా అమలుచేస్తోందని ఆమె కొనియాడారు. ఇండియా​ నుంచి వలస వచ్చిన కుటుంబానికి చెందిన తనకు యునైటెడ్​ నేషన్స్​లో అమెరికా రాయబారి పదవి దక్కడమే అందుకు నిదర్శనమన్నారు. 2024 అమెరికా ప్రెసిడెంట్​ ఎన్నికల్లో రిపబ్లికన్​ పార్టీ అభ్యర్ధిత్వం కోసం ఆమె పోటీపడుతున్నారు. ఇందుకు సౌత్​ కరోలినా వేదికగా నిక్కీ హేలీ గురువారం ప్రచారం ప్రారంభించారు. అమెరికా చరిత్రలో మైనార్టీ వర్గం నుంచి గవర్నర్​గా ఎంపికైన తొలి మహిళను తానేనని నిక్కీ పేర్కొన్నారు. ‘‘జో బైడెన్​ హయాంలో దేశాన్ని దూషించే వారి సంఖ్య పెరిగింది. దేశంలో విద్వేషం  పెరిగింది..  దేశం గాడి తప్పింది అనే దుష్ప్రచారం చేస్తున్నది అలాంటి వాళ్లే. స్వయంగా బైడెన్​ కూడా అమెరికా రేసిస్టు దేశమని అంటున్నారు. నేను చెబుతున్నా అమెరికా రేసిస్టు దేశం కానే కాదు” అని నిక్కీ హేలీ కామెంట్ చేశారు.