- ఫేస్ బుక్ ‘బ్లూటిక్’కు చార్జ్
- ఫీజు నెల నెలా రూ.993
శాన్ ఫ్రాన్సిస్కో: సోషల్ మీడియా దిగ్గజం ట్విట్టర్ బాటలోనే తను కూడా నడవాలని ‘మెటా’ నిర్ణయించింది. ఫేస్బుక్, ఇన్స్టాలలో బ్లూటిక్ఖాతాదారుల నుంచి చార్జీలు వసూలు చేయనున్నట్లు పేర్కొంది. ఖాతాల నిర్ధారణకు, బ్యాడ్జిల నిర్వహణకు నెలవారీ ఫీజు వసూలు చేయనుంది. సెలబ్రెటీల ఖాతాలకు ఇప్పటికే అమలుచేస్తున్న బ్లూటిక్కు ఇకపై నెల నెలా వసూళ్లు మొదలు పెట్టనుంది. ఖాతాల నిర్వహణ ఖర్చుల కింద నెలకు రూ.993 (11.99 డాలర్లు) చార్జ్ చేయనున్నట్లు మార్క్ జుకర్ బర్గ్ తెలిపారు. ఐఫోన్ ఆపరేటింగ్ సిస్టంలలో అయితే నెలకు రూ.1,250 (14.99 డాలర్లు) ఫీజుగా నిర్ణయించామన్నారు. ఫేస్ బుక్, ఇన్ స్టాలలో బ్లూటిక్చార్జీలను తొలుత ఆస్ట్రేలియా, న్యూజిలాండ్ లలో ఈ వారంలోనే అమలులోకి తీసుకురాబోతున్నట్లు జుకర్ బర్గ్ తెలిపారు. కొత్తగా బ్లూటిక్కావాలని అనుకునే వారు ఏదేనీ ప్రభుత్వ గుర్తింపు కార్డుతో తమ ఖాతాలను నిర్ధారించుకుని సబ్ స్క్రైబ్ చేసుకోవచ్చని తెలిపారు. ఈ ప్లాన్ తీసుకున్నోళ్లు నేరుగా తమ కస్టమర్ సర్వీస్ ను సంప్రదించవచ్చని వివరించారు. ఈ కొత్త ఫీచర్తో ఫేస్ బుక్, ఇన్ స్టాల ఖాతాదారులకు మరింత గుర్తింపు, భద్రత లభిస్తుందని జుకర్ బర్గ్ తన ఫేస్ బుక్ అకౌంట్ లో పోస్టు చేశారు.
