- ఢిల్లీ, పంజాబ్ సీఎంలతో కలిసి అందివ్వనున్న సీఎం
- 25 దాకా ఢిల్లీలోనే.. 26న బెంగళూరుకు
హైదరాబాద్ / న్యూఢిల్లీ, వెలుగు: వ్యవసాయ చట్టాలకు వ్యతిరేకంగా ఢిల్లీలో ఉద్యమం చేస్తూ చనిపోయిన పంజాబ్ రైతుల కుటుంబాలకు సీఎం కేసీఆర్ రూ.3 లక్షల చొప్పున చెక్కులు అందించనున్నారు. ఆదివారం ఆయన చండీగఢ్ వెళ్లి పంజాబ్ రైతుల కుటుంబాలను పరామర్శించనున్నారు. తర్వాత ఢిల్లీ, పంజాబ్ ముఖ్యమంత్రులు అరవింద్ కేజ్రీవాల్, భగవంత్మాన్తో కలిసి ఒక్కో రైతు కుంటుంబానికి చెక్కులు ఇస్తారు. నాలుగు రోజుల పర్యటన కోసం కేసీఆర్ శుక్రవారం ఢిల్లీకి వెళ్లారు. బేగంపేట ఎయిర్పోర్టు నుంచి ప్రత్యేక విమానంలో బయల్దేరిన ఆయన సాయంత్రం ఢిల్లీకి చేరుకున్నారు. కేసీఆర్కు మంత్రి వేముల ప్రశాంత్ రెడ్డి, ఎంపీ నామా నాగేశ్వరరావు స్వాగతం పలికారు. ఈ నెల 25 వరకు ఆయన అక్కడే ఉంటారు. దేశ ఆర్థిక పరిస్థితులపై నిపుణులతో తుగ్లక్ రోడ్డులోని తన నివాసంలో భేటీ కానున్నారు. దేశంలోని పరిస్థితులపై జాతీయ మీడియా ప్రతినిధులతోనూ చర్చించనున్నారు. ఢిల్లీలో టీఆర్ఎస్ పార్టీ భవన నిర్మాణంపైనా మంత్రి వేముల, ఎండీపీ ఇన్ఫ్రా సంస్థ ప్రతినిధులతో భేటీ కానున్నారు. కాగా, కేసీఆర్తో పాటు ప్లానింగ్ బోర్డు వైస్ చైర్మన్ బి. వినోద్ కుమార్, ఎంపీలు సంతోష్ , రంజిత్ రెడ్డి, ఎమ్మెల్యే మెతుకు ఆనంద్ ఢిల్లీకి వెళ్లారు. శనివారం కొండగట్టు ఆంజనేయ స్వామి ఆలయంలో హనుమాన్ చాలీసా పారాయణం తర్వాత కవిత ఢిల్లీకి వెళ్తారు. వ్యవసాయ చట్టాలను వ్యతిరేకిస్తూ ఢిల్లీలో రైతులు ఉద్యమం చేసిన సంగతి తెలిసిందే. ఆ ఉద్యమంలో చనిపోయిన రైతుల కుటుంబాలను పరామర్శించేందుకు ఆదివారం కేసీఆర్ చండీగఢ్ వెళ్లనున్నారు. ఢిల్లీ, పంజాబ్ సీఎంలు అరవింద్ కేజ్రీవాల్, భగవంత్మాన్తో కలిసి రూ.3 లక్షల చొప్పున ఆర్థిక సాయం అందించనున్నారు. తర్వాత ఈ నెల 26న ఢిల్లీ నుంచి బెంగళూరుకు వెళ్లి.. మాజీ ప్రధాని దేవెగౌడ, ఆయన కుమారుడు, కర్నాటక మాజీ సీఎం కుమారస్వామితో భేటీ అవుతారు. 27న మహారాష్ట్రలోని రాలేగావ్సిద్ధిలో అన్నా హజారేతో భేటీ అవుతారు. ఈ నెల 29 లేదా 30న బెంగాల్, బీహార్ పర్యటనకు వెళ్తారు.
నిపుణులతో భేటీ
జాతీయ స్థాయిలో ప్రత్యామ్నాయ రాజకీయ వేదిక ఏర్పాటు కోసం ప్రయత్నాలు ముమ్మరం చేసిన సీఎం కేసీఆర్.. వివిధ రంగాలకు చెందిన నిపుణులతో భేటీ కానున్నారు. కాంగ్రెస్, బీజేపీ నేతృత్వంలోని ప్రభుత్వాల ప్రాధాన్యాలు దేశాన్ని ఎలా దెబ్బతీశాయనే విషయంపై చర్చించనున్నారు. జూన్లో హైదరాబాద్ కేంద్రంగా రిటైర్డ్ ఐఏఎస్ అధికారులతో సదస్సు నిర్వహించేందుకు సీఎం కేసీఆర్ ప్లాన్ చేస్తున్నారు. ఆ సమావేశంలో పాల్గొనేందుకు ప్రముఖులను ఆహ్వానించనున్నారు. కాగా, ప్రత్యామ్నాయ రాజకీయ వేదిక ఏర్పాటు కోసం కేసీఆర్ ఇప్పటికే మహారాష్ట్ర సీఎం ఉద్ధవ్ ఠాక్రే, ఎన్సీపీ చీఫ్ శరద్ పవార్, తమిళనాడు సీఎం స్టాలిన్, జార్ఖండ్ సీఎం హేమంత్ సోరెన్లతో భేటీ అయిన సంగతి తెలిసిందే. ఇటీవల హేమంత్ సోరెన్, ఆర్జేడీ నేత తేజస్వి యాదవ్లు హైదరాబాద్లో కేసీఆర్తో సమావేశమయ్యారు. వాటికి కొనసాగింపుగానే ఈ తాజా పర్యటన అని టీఆర్ఎస్ వర్గాలు
అంటున్నాయి.