కర్మన్‌ఘాట్: కర్మన్‌ఘాట్ పరిధిలోని పలు రైస్ డిపోలపై సివిల్ సప్లైస్, విజిలెన్స్ అధికారులు సంయుక్తంగా తనిఖీలు చేపట్టారు. బృందాలుగా ఏర్పడిన అధికారులు పలు దుకాణాల్లో సోదాలు నిర్వహించి బియ్యం నిల్వలు, విక్రయాల తీరును పరిశీలించారు. రేషన్ బియ్యం అక్రమాలపై వచ్చిన ఫిర్యాదుల నేపథ్యంలో ఈ తనిఖీలు చేపట్టారు అధికారులు.
కొన్ని రైస్ డిపోల్లో రేషన్ బియ్యాన్ని సన్న బియ్యంగా మార్చి విక్రయిస్తున్నారనే ఆరోపణలు ఉన్నాయి. అలాగే బియ్యం సంచులపై పేర్కొన్న బరువు కంటే తక్కువ బరువుతో విక్రయిస్తున్నారనే ఫిర్యాదులు కూడా అధికారుల దృష్టికి రావడంతో అధికారులు డిపోల్లో తనిఖీలు నిర్వహించి బియ్యం నిల్వలను పరిశీలించారు.
తనిఖీల్లో భాగంగా పలు రైస్ డిపోల్లో అధికారులు బియ్యం నమూనాలను సేకరించారు. బియ్యం నాణ్యత, నిల్వలు, విక్రయాలకు సంబంధించిన అంశాలను పరిశీలించారు. మరోవైపు అధికారులు తనిఖీలకు వచ్చిన నేపథ్యంలో కొన్ని దుకాణాల నిర్వాహకులు షట్టర్లు మూసివేసి వెళ్లిపోయారు. కొన్ని డిపోలను కనీస ట్రేడ్ లైసెన్స్ లేకుండానే నిర్వహిస్తున్నారనే ఆరోపణలు కూడా ఉన్నాయి. ఈ అంశంపై అధికారులు సంబంధిత రికార్డులను పరిశీలించే అవకాశం ఉంది. తనిఖీల్లో సేకరించిన నమూనాలు, గుర్తించిన అంశాల ఆధారంగా తదుపరి చర్యలు తీసుకునే అవకాశం ఉందని తెలుస్తోంది.
రేషన్ బియ్యం అక్రమ విక్రయాలు, తూకాల్లో వ్యత్యాసాలు, అనుమతులు లేకుండా వ్యాపార నిర్వహణ వంటి అంశాలపై అధికారులు దృష్టి సారించారు. తనిఖీల అనంతరం నిబంధనల ఉల్లంఘనలు నిర్ధారణ అయితే సంబంధిత డిపోలపై చర్యలు తీసుకునే అవకాశం ఉంది.
