- ఇప్పటికే స్టూడెంట్ల ఖాతాల్లో నేరుగా జమచేయాలని ప్రభుత్వ నిర్ణయం
- విద్యార్థుల నుంచి కాలేజీలు ఫీజు వసూలు చేసుకోవచ్చన్న హైకోర్టు
- జీవో నంబర్7లోని 12వ నిబంధనపై కొనసాగుతున్న స్టే
- కౌంటర్ దాఖలుకు సిద్ధమవుతున్న అధికారులు
హైదరాబాద్, వెలుగు: ఈ విద్యా సంవత్సరం నుంచి స్టూడెంట్ల ఖాతాల్లో ఫీజు రీయింబర్స్మెంట్ జమచేయాలని నిర్ణయం తీసుకున్న రాష్ట్ర ప్రభుత్వం ఏ టైంలో, ఎన్ని వాయిదాల్లో అందించాలనేదానిపై కసరత్తు చేస్తోంది. ప్రతి మూడు నెలలకోసారి (క్వార్టర్లీ) రీయింబర్స్ చేయాలా? లేదంటే సెమిస్టర్ వారీగా అందించాలా? అనే అంశంపై తర్జనభర్జన పడుతోంది. అయితే, సెమిస్టర్వైపే పలువురు అధికారులు మొగ్గుచూపుతున్నట్టు తెలుస్తోంది. దీనిపై ఎస్సీ సంక్షేమ శాఖ స్పెషల్ సీఎస్ సభ్యసాచి ఘోష్ నేతృత్వంలో ఇప్పటికే పలుమార్లు భేటీ అయిన ఉన్నతాధికారుల కమిటీ.. ఒకటి, రెండు రోజుల్లో ప్రభుత్వానికి నివేదిక సమర్పించనున్నట్టు తెలిసింది. విద్యార్థుల నుంచి మేనేజ్మెంట్లు నేరుగా ఫీజులు వసూలు చేసుకోవచ్చని ఇప్పటికే హైకోర్టు స్పష్టం చేసింది. ఇటీవల ప్రభుత్వం జారీ చేసిన జీవో నంబర్7 ప్రకారం స్టూడెంట్ల ఖాతాల్లో రీయింబర్స్మెంట్ సొమ్ము జమ చేశాకే కాలేజీలు ఫీజులు తీసుకోవాలన్న 12వ నిబంధనపై హైకోర్టు స్టే ఇచ్చింది. ఈ క్రమంలో మూడు నెలలకోసారి లేదంటే సెమిస్టర్ వారీగా నిధులు విడుదల చేస్తే మేనేజ్మెంట్ల నుంచి సానుకూలత వస్తుందని ప్రభుత్వం భావిస్తోంది.
రాష్ట్రంలో డిగ్రీ, పీజీ , ఇంజినీరింగ్, ఫార్మసీ, ఎంబీఏ, ఎంసీఏ, లా, బీఈడీ, ఎంఈడీ సహా అన్ని ప్రొఫెషనల్ కోర్సులు చదివే సుమారు 12.4 లక్షల మంది విద్యార్థులు ఏటా ఫీజు రీయింబర్స్మెంట్, స్కాలర్షిప్స్కోసం దరఖాస్తు చేసుకుంటున్నారు. ఇందుకోసం ప్రభుత్వం ఏడాదికి రూ. 2,500 కోట్ల దాకా ఖర్చు చేస్తోంది. ఈ నిధులను నేరుగా కాలేజీ ఖాతాల్లో జమ చేస్తోంది. కొన్నేండ్లుగా ప్రభుత్వాలు ఇన్టైంలో ఫీజు రీయింబర్స్మెంట్ విడుదల చేయకపోవడంతో సుమారు రూ.7,500 కోట్ల బకాయిలు పేరుకపోయాయి. ఈ నిధుల కోసం ఓ వైపు ప్రభుత్వంపై ఒత్తిడి పెంచుతున్న మేనేజ్మెంట్లు, మరోవైపు స్టూడెంట్లను ఫీజుల కోసం వేధిస్తున్నాయి. సర్కారు నుంచి వచ్చాక తిరిగి ఇస్తామంటూ ముందే ఫీజులు కట్టించుకుంటున్నాయి. ఫీజులు కట్టని స్టూడెంట్లకు సర్టిఫికెట్లు ఇవ్వకుండా సతాయిస్తున్నాయి. దీనికితోడు కొన్ని కాలేజీల్లో.. లేని స్టూడెంట్లను ఉన్నట్టు చూపి భారీ మొత్తంలో ఫీజు రీయింబర్స్మెంట్ కొట్టేస్తున్నాయనే ఆరోపణలూ ఉన్నాయి. ఈ సమస్యకు చెక్పెట్టేలా ఈ విద్యా సంవత్సరం నుంచి కాలేజీ ఖాతాల్లో కాకుండా నేరుగా స్టూడెంట్ల ఖాతాల్లోనే ఫీజు రీయింబర్స్మెంట్జమచేయాలని ప్రభుత్వం నిర్ణయం తీసుకుంది.
జీవో 7పై యాజమాన్యాల ఆందోళన..
స్కాలర్ షిప్లు, ఫీజు రీయింబర్స్ మెంట్ నేరుగా స్టూడెంట్ల ఖాతాల్లోనే వేస్తామని ప్రకటించిన ప్రభుత్వం ఇందుకు తగ్గట్టుగా ఇటీవల జీవో 7ను రిలీజ్ చేసింది. ఈ జీవోలోని 12వ నిబంధన ప్రకారం.. ప్రభుత్వం డైరెక్ట్ బెనిఫిట్ ట్రాన్స్ఫర్(డీబీటీ) పద్ధతిలో ఫీజురీయింబర్స్మెంట్ను స్టూడెంట్ల ఖాతాల్లో నేరుగా జమ చేశాకే కాలేజీకి ఫీజులు చెల్లిస్తారని, అప్పటిదాకా వారి నుంచి ఎలాంటి ఫీజులు వసూలు చేయవద్దని స్పష్టం చేసింది. అదే సమయంలో స్కాలర్షిప్లు, ఫీజు రీయింబర్స్మెంట్ పక్కదారి పట్టకుండా విద్యార్థులకు ఆధార్ గుర్తింపును తప్పనిసరి చేసింది. స్టూడెంట్స్ ఈపాస్ పోర్టల్లో రిజిస్టర్ చేసుకునేటప్పుడు బయోమెట్రిక్ అథెంటికేషన్ పూర్తి చేయాల్సి ఉంటుంది.
ఆధార్ లింక్ అయిన బ్యాంక్ అకౌంట్ వివరాలను మాత్రమే పేర్కొనాలి. ప్రతి కాలేజీలో ఆధార్ ఆధారిత హాజరు విధానాన్ని అమల్లోకి తేనున్నట్టు ఉత్తర్వుల్లో వెల్లడించింది. విద్యార్థులు అటెండెన్స్ శాతాన్ని బట్టి, వారి అకడమిక్ ప్రోగ్రెస్ ఆధారంగా నిధులను విడతల వారీగా విడుదల చేయనున్నట్టు స్పష్టం చేసింది. ఈ నిబంధనలు పలు కాలేజీల యాజమాన్యాలకు మింగుడుపడడం లేదు. ప్రధానంగా జీవో 7లోని 12వ నిబంధనకు వ్యతిరేకంగా ఇటీవల యాజమాన్యాలు మరోసారి హైకోర్టును ఆశ్రయించాయి. ఈ నిబంధన వల్ల కాలేజీలు ఫీజులు వసూలు చేసే పరిస్థితి ఉండదని, దీన్ని నిలిపివేస్తూ గతంలో ఇచ్చిన మధ్యంతర ఉత్తర్వులను పొడిగించాలని కోరాయి. ఈక్రమంలో జూన్ 24లోగా కౌంటర్లు దాఖలు చేయాలని ప్రభుత్వాన్ని హైకోర్టు ఆదేశించింది. ఈ నేపథ్యంలోనే మధ్యేమార్గంగా సెమిస్టర్వారీగా ఎప్పటికప్పుడు ఫీజురీయింబర్స్మెంట్ చెల్లిస్తే అటు స్టూడెంట్లకు, ఇటు మేనేజ్మెంట్లకు ఎలాంటి ఇబ్బంది ఉండదని ప్రభుత్వం భావిస్తోంది. ఈ మేరకు స్పష్టమైన షెడ్యూల్తో కూడిన కౌంటర్ దాఖలు చేసేందుకు అధికారులు సిద్ధమవుతున్నారు.
