భద్రాద్రికొత్తగూడెం, వెలుగు : మిగ్ జాం తుఫాన్ దృష్ట్యా ఉద్యోగులకు సంబంధించి అన్ని రకాల సెలవులను రద్దు చేసినట్టు కలెక్టర్ ప్రియాంక అల తెలిపారు. సెలవుల్లో వెళ్లిన సిబ్బంది తక్షణమే విధులకు హాజరుకావాలని ఆదేశించారు. మంగళవారం అన్ని శాఖల జిల్లా అధికారులతో నిర్వహించిన టెలీ కాన్ఫరెన్స్లో ఆమె మాట్లాడారు.
తుఫాన్ ప్రభావం వల్ల రెండు రోజులు జిల్లాకు భారీ వర్ష సూచన నేపథ్యంలో ప్రభుత్వ యంత్రాంగం అలర్ట్గా ఉండాలన్నారు. ప్రజలకు ఎలాంటి ఇబ్బందులు లేకుండా చూడాలని చెప్పారు. ముంపునకు గురయ్యే లోతట్టు ప్రాంతాల ప్రజలను అలర్ట్ చేయాలన్నారు. గ్రామాలు, మున్సిపాలిటీలలో శిథిలావస్థలో ఉన్న ఇండ్లలో నివసిస్తున్న ప్రజలను సురక్షిత ప్రాంతాలకు తరలించాలని ఆదేశించారు.
తుఫాన్ దృష్ట్యా జిల్లాలోని గవర్నమెంట్, ప్రైవేట్ స్కూళ్ల, అంగన్వాడీ స్కూళ్లకు బుధవారం కూడా సెలవులు ఇస్తున్నట్టు తెలిపారు. ఎమర్జెన్సీ సేవలకు 08744241950 నంబర్కు ఫోన్ చేయాలని చెప్పారు. గ్రామాలు, పట్టణాల్లో మురుగునీరు నిల్వ లేకుండా చర్యలు చేపట్టాలన్నారు. బ్లీచింగ్ చల్లాలని ఆదేశించారు. ముంపు తగ్గే వరకు వరి కోతలు చేయవద్దని రైతులకు సూచించారు.
ధాన్యం తడవకుండా టార్పాలిన్లు సప్లై చేయాలని అధికారులకు చెప్పారు. కొనుగోలు చేసిన వడ్లను సమీప గోడౌన్లలో భద్రపర్చాలన్నారు. ఈ ప్రోగ్రాంలో అడిషనల్ కలెక్టర్లు పి. రాంబాబు, మధుసూదనరాజు, డీపీఓ రమాకాంత్, జడ్పీ సీఈఓ విద్యాలత, డీఈఓ వెంకటేశ్వరాచారి, డీఎంహెచ్ఓ డాక్టర్ శిరీష, మహిళా, శిశు సంక్షేమ శాఖ జిల్లా అధికారి విజేత, తదితరులు పాల్గొన్నారు.
