ఆదిలాబాద్ టౌన్, వెలుగు: వసతి లేని అనాథ పిల్లల సంరక్షకులకు ఇందిరమ్మ ఇండ్లు మంజూరు చేస్తామని, వారి సమస్యల పరిష్కారానికి కృషి చేస్తామని ఆదిలాబాద్ కలెక్టర్ రాజర్షి షా అన్నారు. శుక్రవారం కలెక్టరేట్లో అనాథ పిల్లలతో సమావేశమయ్యారు. వారి విద్య, ఆరోగ్యం, సమస్యలపై చర్చించారు. పిల్లలకు ఆయుష్మాన్ భారత్ కార్డులు, ఆరోగ్యశ్రీ కార్డులు పంపిణీ చేసి, వారితో కలిసి భోజనం చేశారు.
జిల్లాలోని 202 మంది అనాథ పిల్లలకు ఆరోగ్యశ్రీ, 8 మందికి ఆయుష్మాన్ భారత్ కార్డులు అందించామని తెలిపారు. కార్యక్రమంలో అడిషనల్ కలెక్టర్ శ్యామలాదేవి, ట్రైనీ కలెక్టర్ సలోని, డీడబ్ల్యూఓ మిల్కా, డీసీపీవో రాజేంద్రప్రసాద్, ఆరోగ్యశ్రీ డిస్ట్రిక్ట్ మేనేజర్ సత్యనారాయణ తదితరులు పాల్గొన్నారు.
