రాష్ట్ర పోలీస్ డిపార్టుమెంట్ తలమానికం లాంటి కమాండ్ కంట్రోల్ సెంటర్ భవనాన్ని త్వరలోనే ప్రారంభిస్తామన్నారు డీజీపీ మహేందర్ రెడ్డి. రాష్ట్రంలోని అన్ని ప్రభుత్వ విభాగాలను కమాండ్ కంట్రోల్ సెంటర్ తో అనుసంధానం చేస్తామన్నారు.
నిర్మాణంలో ఉన్న ఈ భవన సముదాయంలో… రెండు అత్యంత ఎత్తైన టవర్లను ను కలిపే స్కై వాక్ బ్రిడ్జ్ ను ఇవాళ డీజీపీ ఆవిష్కరించారు. దేశంలోనే ఇది అత్యంత ఎత్తైన బరువైన స్కైవాక్. దీని పొడవు 2వందల అడుగులు. బరువు 425 మెట్రిక్ టన్నులు.
ఈ కార్యక్రమానికి డీజీపీ తో పాటు… హోమ్ సెక్రటరీ రాజీవ్ త్రివేది, హైదరాబాద్ పోలీస్ కమిషనర్ అంజనీకుమార్, ఆర్ అండ్ బి ప్రిన్సిపల్ సెక్రటరీ రామకృష్ణతో పాటు మరికొందరు అధికారులు హాజరయ్యారు.
ఈ భవన నిర్మాణం తొందర్లోనే పూర్తయి.. అతి త్వరలోనే ప్రారంభం అవుతుందని డీజీపీ మహేందర్ రెడ్డి చెప్పారు. ఈ భవనంలో ఉపయోగిస్తున్న సాంకేతిక విధానం… అద్భుతాలు సృష్టిస్తుందని ఆర్ అండ్ బి శాఖ ప్రధాన కార్యదర్శి రామకృష్ణ చెప్పారు. ఒక్క పోలీస్ డిపార్టుమెంట్ మాత్రమే కాదు.. అన్ని ప్రభుత్వ శాఖలను టెక్నాలజీ సాయంతో కనెక్ట్ చేస్తున్నామని చెప్పారు.
