గవర్నర్​కు పంచాయతీ రాజ్ చాంబర్​ నేతల ఫిర్యాదు

• ఇట్ల మళ్లిస్తే పంచాయతీ రాజ్ వ్యవస్థ మనుగడ కష్టమని ఆవేదన
• కేంద్రానికి పంపిస్తానని గవర్నర్ తమిళిసై హామీ

హైదరాబాద్, వెలుగు: కేంద్ర ప్రభుత్వం 15వ ఆర్థిక సంఘం ద్వారా గ్రామ పంచాయతీలకు విడుదల చేసిన నిధులను రాష్ట్ర ప్రభుత్వం దారి మళ్లించిందని పంచాయతీ రాజ్ చాంబర్ అధ్యక్షుడు చింపుల సత్యనారాయణ రెడ్డి ఆరోపించారు.  గత నెల(డిసెంబరు)  24న  రాష్ట్రంలోని జిల్లా పరిషత్​లు, మండల పరిషత్​లు, గ్రామ పంచాయతీలకు కేంద్రం రూ.3,500 కోట్లు బదిలీ చేసిందన్నారు. ఆ తర్వాతి రోజు క్రిస్మస్ హాలిడే ఉన్నప్పటికీ.. అదే రోజున నిధులను రాష్ట్ర ఖజానాకు దారి మళ్లించారని పేర్కొన్నారు. ఈ వ్యవహారంపై విచారణ జరిపించి, చర్యలు తీసుకోవాలని మంగళవారం రాజ్ భవన్లో గవర్నర్ తమిళిసైని కలిసి పంచాయతీ రాజ్ చాంబర్​ నేతలు సత్యనారాయణ రెడ్డి, బాదేపల్లి సిద్ధార్థ, శ్రీశైలం, వెంకట్ , అశోక్ రావు వినతిపత్రం అందచేశారు.  కేంద్రం నుంచి వచ్చే నిధులను దారి మళ్లించే కార్యక్రమం గతంలో కూడా జరిగిందని, మున్ముందు ఇలాగే జరిగితే పంచాయతీ రాజ్ వ్యవస్థ మనుగడ కష్టమని తెలిపారు.

గతంలో మైనింగ్ సెస్, రిజిస్ట్రేషన్​స్టాంప్ డ్యూటీ లోకల్ బాడీలకు వస్తుండగా.. 2018లో తీసుకొచ్చిన కొత్త పంచాయతీ రాజ్ యాక్ట్ లో ఈ నిధులు ప్రభుత్వానికి వచ్చేలా సవరణలు చేశారన్నారు. ఈ  వినతిపత్రాన్ని కేంద్ర పంచాయతీ రాజ్ శాఖ మంత్రికి పంపాలని కోరారు. ఈ అంశంపై గవర్నర్ సానుకూలంగా స్పందించారని సత్యనారాయణ రెడ్డి చెప్పారు. తెలంగాణలో జరుగుతున్న గ్రామపంచాయతీల  నిధుల మళ్లింపు వ్యవహారంపై తనకు అవగాహన ఉందని, మీడియాలో దీనిపై వచ్చిన కథనాలను చూశానని గవర్నర్ అన్నట్లు ఆయన వెల్లడించారు.