హైదరాబాద్, వెలుగు: ఆరు ప్రధాన హామీలతో కాంగ్రెస్ గ్యారెంటీలను ప్రకటించింది. చేవెళ్లలో భారీ బహిరంగ సభను ఏర్పాటు చేసి సోనియా గాంధీ చేతుల మీదుగా గ్యారెంటీలను విడుదల చేసింది. ఆ హామీలను వంద రోజుల్లోనే అమలు చేస్తామని ప్రతి సభలో, ఇంటింటి ప్రచారంలోనూ జనానికి నేతలు, అభ్యర్థులు హామీ ఇస్తున్నారు.
ఈ క్రమంలోనే ఆ హామీలన్నింటినీ కచ్చితంగా అమలు చేస్తామంటూ రాష్ట్రవ్యాప్తంగా కాంగ్రెస్ అభ్యర్థులంతా స్వయంగా ప్రజలకు హామీ పత్రాన్ని (అఫిడవిట్లు)/బాండ్ రాసిస్తున్నారు. దైవ సాక్షిగా ప్రమాణం చేసిమరీ ఆ హామీ పత్రాలపై సంతకాలు చేస్తున్నారు. సీఎల్పీ నేత భట్టి విక్రమార్క, గండ్ర సత్యనారాయణ (భూపాలపల్లి), జీవన్ రెడ్డి (జగిత్యాల), పొన్నం ప్రభాకర్ (హుస్నాబాద్), వేముల వీరేశం (నకిరేకల్), గడ్డం వినోద్ (బెల్లంపల్లి), ఎ. చంద్రశేఖర్ (జహీరాబాద్), ఏనుగు రవీందర్ రెడ్డి (బాన్సువాడ) సహా రాష్ట్రంలోని ఎమ్మెల్యే అభ్యర్థులంతా గ్యారెంటీలను అమలు చేసే గ్యారెంటీ తమది అని అఫిడవిట్లు రాసిస్తున్నారు. ఈ లీడర్లంతా ఇలా రాజకీయాల్లో కొత్త ట్రెండ్కు తెరతీశారు. ఈ క్రమంలోనే తమను గెలిపిస్తే అన్ని గ్యారెంటీలను అమలు చేస్తామంటూ నలభై యాభై నియోజకవర్గాల్లో కాంగ్రెస్ అభ్యర్థులు హామీ పత్రం రాసిస్తున్నారు. చిన్నా పెద్దా తేడాలేకుండా లీడర్లంతా బాండ్ రాసిస్తుండడం రాజకీయ వర్గాల్లో ఆసక్తిని రేపుతున్నది.
పసుపుబోర్డు తెస్తానని అరవింద్...
అఫిడవిట్లు ఇవ్వడం ఇప్పుడు ట్రెండింగ్లో ఉంది. 2019 లోక్సభ ఎన్నికల్లోనూ పసుపు బోర్డును ఏర్పాటు చేయిస్తానని నిజామాబాద్ ఎంపీ ధర్మపురి అరవింద్ హామీ పత్రాన్ని రాసిచ్చారు. పసుపు బోర్డు లేట్ కావడంతో అధికార బీఆర్ఎస్ సహా, కాంగ్రెస్ నేతలు అరవింద్ హామీ పత్రాన్ని తెరపైకి తెచ్చారు. పసుపు బోర్డు తెస్తానన్న హామీ ఏమైందని ప్రశ్నిస్తూ.. ఆ బాండ్ పేపర్ను వైరల్ చేశారు. తాజాగా పలువురు ఎమ్మెల్యే అభ్యర్థులూ తమను గెలిపిస్తే ఇచ్చిన హామీలన్నింటినీ నెరవేరుస్తామని బాండ్లు రాసిస్తున్నారు.
రాసిస్తేగానీ నమ్మే పరిస్థితి లేదు..
ఎన్నికలు వచ్చాయి కాబట్టి రాజకీయ పార్టీలు ఎన్నో హామీలు గుప్పిస్తుంటాయి. ఆపై అధికారం రాగానే పక్కనపడేస్తుంటాయి. సీఎం కేసీఆర్ కూడా ఇలాగే ఎన్నో హామీలిచ్చి అమలు చేయలేదంటూ ప్రతిపక్షాలు ఆరోపిస్తున్నాయి. దళితులకు మూడు ఎకరాల భూమి, నిరుద్యోగ భృతి, ఇంటికో ఉద్యోగం, పోడు పట్టాలు, డబుల్ బెడ్రూం ఇండ్లు, ఉచిత ఎరువులు.. తదితర హామీల్లో ఒక్కటీ నెరవేర్చలేదన్న విమర్శలున్నాయి. ఇప్పుడు బీఆర్ఎస్తో పాటు కాంగ్రెస్ పార్టీ, బీజేపీ కూడా మేనిఫెస్టోల్లో హామీలు గుప్పించాయి.
ఈ హామీలు కూడా అధికారంలోకి వచ్చాక మర్చిపోతారంటూ విమర్శలు వస్తున్నాయి. ఈ క్రమంలోనే తాము తూచా తప్పకుండా ఇచ్చిన హామీలను అమలు చేస్తామంటూ బాండ్ పేపర్ మీద రాసివ్వాలని కొన్ని నియోజకవర్గాల్లో ప్రజలే అభ్యర్థులను నిలదీస్తున్నారు. అలా రాసిస్తేనయినా గెలిచాక అమలు చేయకపోతే నిలదీయొచ్చని భావిస్తున్నారు. దీంతో చాలా మంది లీడర్లు హామీలు చేస్తమంటూ బాండ్ పేపర్లమీద రాసిస్తున్నారు.