హైదరాబాద్, వెలుగు: టీఎస్పీఎస్సీ పేపర్ లీకేజీపై యాంటీ కరప్షన్ బ్యూరో(ఏసీబీ)కు కాంగ్రెస్ ఫిర్యాదు చేసింది. గ్రూప్1తో పాటు టీఎస్ పీఎస్సీ నిర్వహించిన పోటీ వివిధ పరీక్షల్లో అక్రమాలు జరిగాయని ఆరోపించింది. ఈ మేరకు ఏసీబీ డైరెక్టర్ జనరల్ రవి గుప్తాకు శనివారం పీసీసీ చీఫ్ రేవంత్ తరఫున పార్టీ నేతలు మల్లు రవి, బల్మూరి వెంకట్, మానవతారాయ్ ఫిర్యాదు కాపీని అందజేశారు. టీఎస్పీఎస్సీ సహా అన్ని ప్రభుత్వ శాఖలకు సాఫ్ట్వేర్, కంప్యూటర్లను ఐటీ శాఖ ఆధ్వర్యంలో పనిచేసే తెలంగాణ స్టేట్ టెక్నాలజీ సర్వీసెస్(టీఎస్టీఎస్) సరఫరా చేస్తుందని కాంగ్రెస్ నేతలు ఫిర్యాదులో పేర్కొన్నారు.
పేపర్ లీక్ కేసుకు 2015లోనే లింకులున్నాయని ఆరోపించారు. ఆనాడు టీఎస్పీఎస్సీని సందర్శించిన మంత్రి కేటీఆర్.. సాఫ్ట్వేర్, కంప్యూటర్లను అప్గ్రేడ్ చేయాల్సిందిగా ఆదేశించడంతో టీఎస్టీఎస్ వాటిని అప్గ్రేడ్ చేసిందని గుర్తు చేశారు. పేపర్ లీక్ కేసులో ఏ2గా ఉన్న రాజశేఖర్ రెడ్డి.. టీఎస్టీఎస్ ఔట్సోర్సింగ్ ఉద్యోగి అని పేర్కొన్నారు. కమిషన్లోని పెద్దలకు తెలియకుండా పేపర్ లీక్ జరిగే ఆస్కారమే లేదని స్పష్టం చేశారు. ఈ విషయంలో డబ్బు చేతులు మారాయని, అవినీతి అక్రమాలు జరిగాయని.. కాబట్టి కేసును ఏసీబీ విచారించేందుకు అధికారం ఉంటుందని నేతలు పేర్కొన్నారు. ప్రస్తుతం కేసును సిట్ విచారిస్తున్నదని, ఎక్వైరీని మంత్రి కేటీఆర్ ప్రభావితం చేస్తున్నారని ఆరోపించారు.
