హైదరాబాద్, వెలుగు: గిరిజనులకు 12 శాతం రిజర్వేషన్ల హామీని ఇచ్చి అమలు చేయకుండా మోసం చేసినందుకు సీఎం కేసీఆర్ సారీ చెప్పాలని పీసీసీ మాజీ అధ్యక్షుడు, ఎంపీ ఉత్తమ్కుమార్ రెడ్డి అన్నారు. బుధవారం ఢిల్లీలోని తన నివాసంలో మీడియాతో మాట్లాడుతూ.. కేంద్రానికి అన్ని విషయాల్లో మద్దతు ఇస్తున్న టీఆర్ఎస్ గిరిజనులకు ఎందుకు రిజర్వేషన్లు సాధించలేక పోయిందని ఆయన ప్రశ్నించారు. తెలంగాణ గిరిజనులను టీఆర్ఎస్, బీజేపీ కలిసి మోసం చేస్తున్నాయన్నారు. తెలంగాణ ఎంపీలు ఏ రోజు కూడా గిరిజన రిజర్వేషన్ల అంశంపై స్పందించలేదన్నారు. ఏపీలో ట్రైబల్ వర్సిటీ ఏర్పాటై పని చేస్తున్నదని.. తెలంగాణలో మాత్రం ఇంత వరకు ఆ ఊసేలేదన్నారు. గిరిజనుల రిజర్వేషన్లపై తాము పార్లమెంటులో ప్రశ్నిస్తున్నా.. రాష్ట్ర ప్రభుత్వం నుంచి ఎలాంటి ప్రతిపాదనా రాలేదనే సమాధానమే వస్తున్నదన్నారు. గిరిజనులకు జనాభా ప్రాతిపదికగా తక్షణం రిజర్వేషన్లు ఇవ్వాలని ఉత్తమ్ రాష్ట్ర సర్కార్ను డిమాండ్ చేశారు.
