నాగర్కర్నూల్, వెలుగు: ‘‘యాభై ఏండ్లపాటు కాంగ్రెస్ పార్టీ దేశాన్ని పాలించింది.. ఇప్పుడు మరొక చాన్సివ్వాలని రాహుల్ గాంధీ అడుగుతున్నడు. ఈ యాభై ఏండ్లలో నెహ్రూ నుంచి సోనియావరకు ఏం ఉద్ధరించారు, మళ్లీ ఎందుకు చాన్సివ్వాలో ఆయన ప్రజలకు చెప్పాలి” అని మంత్రి కేటీఆర్ డిమాండ్ చేశారు. తాగడానికి నీళ్లు, సాగుకు కరెంటు ఇవ్వక జనాలను సావగొట్టింది సరిపోదా? అని ప్రశ్నించారు. కాంగ్రెస్ పార్టీకి కాలం చెల్లిందని మంత్రి చెప్పారు. రాహుల్ గాంధీని గంటల తరబడి ఈడీ ఆఫీసులో కూర్చోబెట్టినా పట్టించుకునే దిక్కేలేదని ఎద్దేవా చేశారు. కుల పిచ్చితో కాంగ్రెస్పార్టీ, మత పిచ్చితో బీజేపీ.. దేశాన్ని నాశనం చేస్తున్నాయని ఆరోపించారు. శనివారం నాగర్ కర్నూల్ జిల్లాలో పలు ప్రారంభోత్సవాలు, శంకుస్థాపనల కార్యక్రమాల్లో మంత్రి కేటీఆర్ పాల్గొన్నారు. ఆ తర్వాత జరిగిన సభలో బీజేపీ, కాంగ్రెస్ పార్టీలపై తీవ్ర విమర్శలు చేశారు. టీఆర్ఎస్ సంస్కారవంతమైన పరిపాలన అందించే పార్టీ అని మంత్రి చెప్పారు. కాంగ్రెస్ పార్టీకి చరిత్రే తప్ప భవిష్యత్తు లేదన్నారు. హిందూ ముస్లింల మధ్య పంచాయితీ పెట్టి, విద్వేషాలను రెచ్చగొట్టి దేశంలో బీజేపీ అశాంతిని సృష్టిస్తోందని మంత్రి మండిపడ్డారు. కృష్ణా జలాల్లో మన రాష్ట్ర వాటాను కేంద్రం ఎందుకు తేల్చడంలేదని ప్రశ్నించారు. ఈ కార్యక్రమంలో మంత్రులు నిరంజన్ రెడ్డి, శ్రీనివాస్ గౌడ్, ఎమ్మెల్యేలు బీరం హర్షవర్దన్ రెడ్డి, మర్రి జనార్దన్ రెడ్డి, ఆల వెంకటేశ్వర్ రెడ్డి, లక్ష్మారెడ్డి, జైపాల్ యాదవ్, రాజేందర్ రెడ్డి, అబ్రహాం, ఎంపీ రాములు, ఎమ్మెల్సీలు కూచుకుళ్ళ దామోదర్ రెడ్డి, కసిరెడ్డి నారాయణ రెడ్డి, గోరటి వెంకన్న, సురభి వాణిదేవి, జెడ్పీ చైర్మన్ పద్మావతి తదితరులు పాల్గొన్నారు.
జూపల్లి ఇంటికి వెళ్లిన కేటీఆర్
మీటింగ్ పూర్తయిన తర్వాత మంత్రి కేటీఆర్ మిగతా మంత్రులతో కలిసిజూపల్లి ఇంటికి వెళ్లారు. ఎమ్మెల్యే బీరం హర్షవర్ధన్ రెడ్డితో విభేదాల వల్ల శనివారం జరిగిన కార్యక్రమాలకు జూపల్లి హాజరుకాలేదు. దీంతో మంత్రి కేటీఆర్ వెళ్లి జూపల్లిని కలిశారు. ఈ క్రమంలో ఎమ్మెల్యే తమపై కక్ష సాధిస్తున్నారని, తమపై తప్పుడు కేసులు బనాయిస్తున్నారని జూపల్లి అనుచరులు మంత్రి కేటీఆర్దగ్గర వాపోయారు.
కేటీఆర్ కాన్వాయి అడ్డగింత
మంత్రి కేటీఆర్ కాన్వాయిని బీజేపీ, కాంగ్రెస్ నేతలు అడ్డుకున్నారు. నాగర్ కర్నూల్ నుంచి బిజినేపల్లికి వెళ్తుండగా వెంకటాపూర్వద్ద ఒక్కసారిగా రోడ్డుపైకి వచ్చి కాన్వాయ్ను అపేశారు. పోలీసులు వారిని అరెస్టు చేసి మంత్రి కాన్వాయ్కి దారిచ్చారు. వాస్తవానికి మంత్రి పర్యటన నేపథ్యంలో బీజేపీ, కాంగ్రెస్ పార్టీల నేతలు పలువురిని ముందస్తుగానే పోలీసులు అరెస్టు చేశారు.
