ఒకప్పుడు ఇంటికి అతిథులు వస్తే మట్టి కుండలోంచి చల్లటి నీళ్లు ఇచ్చి, ఆ తరువాత మజ్జిగో, నిమ్మరసమో కలిపి ఇచ్చే వాళ్లు. కాని ప్రస్తుతం కూల్డ్రింక్స్ తప్పనిసరి అయ్యాయి. పిల్లలు కూడా వీటిని ఇష్టంగా తాగుతున్నారు. కానీ ఈ కూల్డ్రింక్స్ ఎక్కువగా తాగడం వల్ల ఎన్నో అనారోగ్య సమస్యలు వస్తాయి.
వేపవిలో ఎండ తీవ్రత నుంచి ఉపశమనం కోసం ఎక్కువమంది శీతల పానీయాలు తాగడానికి ఆసక్తి చూపుతారు. యువత పార్టీ ఏదైనా బిర్యానీతో పాటు కూల్డ్రింక్ ఉండాల్సిందేనంటారు. నలుగురు స్నేహితులు ఒకచోట కలిస్తే కబుర్లలో కూల్డ్రింక్ భాగమైపోతుంది. ఒక్క మాటలో చెప్పాలంటే కూల్డ్రింక్ రోజువారీ జీవితంలో భాగమైంది. రోజుకు లీటర్పైనే తాగేవాళ్లు కూడా ఉన్నారు. కానీ ఇవి ఎక్కువగా తాగితే ప్రాణాలకు ముప్పు తప్పదంటున్నారు నిపుణులు.
రక్తపోటుని పెంచుతుంది
కూల్డ్రింక్లో 7 చెంచాలకు సరిపడా పంచదార ఉంటుంది. సాధారణంగా ఇంత మోతాదులో చక్కెర తింటే వాంతులు అవుతాయి. కాని కూల్ డ్రింక్లో ఉండే ఫాస్ఫరిక్ యాసిడ్ వాంతులు రాకుండా చేస్తుంది. ఇది రక్తంలో చేరడం వల్ల షుగర్ లెవల్స్ అమాంతం పెరిగిపోతాయి. అంతేకాదు కూల్డ్రింక్స్లో ఉండే కెఫిన్ వల్ల శరీరంలో డోపమైన్ అనే కెమికల్ ఉత్పత్తి జరుగుతుంది. దీని వల్ల రక్తపోటు పెరుగుతుంది. గుండె కొట్టుకునే వేగంలో కూడా మార్పులొస్తాయి. క్యాల్షియం తగ్గుతుంది. కొన్ని సందర్భాల్లో గుండె సమస్యలు తలెత్తి హార్ట్ స్ర్టోక్ కూడా వచ్చే అవకాశం ఉంటుంది. అందువల్ల కూల్ డ్రింక్స్ మోతాదుకి మించి తాగకూడదు. అసలు తాగకుండా ఉంటే… మీ ఆరోగ్యంతో పాటు పర్యావరణానికీ మేలు.
ఎన్నో సమస్యలు
కూల్ డ్రింక్స్లో ఫాస్ఫరిక్ యాసిడ్, కార్బోలిక్ యాసిడ్ లాంటివి కలుపుతారు. ఇవి ఆరోగ్యానికి చాలా ప్రమాదకరం. అందుకే కూల్ డ్రింక్స్ని తాగిన వెంటనే త్రేన్పులు వస్తాయి. కడుపులో మంట ఎసిడిటీ సమస్యలు కూడా ఎదురవుతాయి. అంతేకాదు ఫాస్ఫరిక్ యాసిడ్ చిన్న పేగులో చేరి అక్కడ ఉండే క్యాల్షియం, మెగ్నీషియం, జింక్ వంటి వాటికి అడ్డుకట్ట వేస్తుంది. దీంతో తరచుగా మూత్రవిసర్జన జరగడంతో పాటు, డీహైడ్రేషన్, దాహం లాంటివి పెరుగుతాయి.
ఆకలి మందగిస్తుంది
కూల్డ్రింక్స్ తాగడం వల్ల కిడ్నీలపై ఒత్తిడి పెరుగుతుంది. అవి కూల్డ్రింక్స్లో ఉండే పదార్థాలను శరీరం నుంచి బయటకు పంపేయడానికి నీటిని ఎక్కువగా వాడుకుంటాయి. దీంతో డీహైడ్రేషన్ బారిన పడి, నీరసం వస్తుంది. ఒక్కోసారి మూర్ఛపోయే ప్రమాదం కూడా ఉంటుంది. అంతేకాదు నిల్వ ఉంచిన కూల్డ్రింక్స్ తాగడం వల్ల ఊపిరితిత్తులు దెబ్బతిని శ్వాసకోశ వ్యాధులు వస్తాయి. దీనిలో వాడే గ్యాస్ వలన ఆకలి కాదు. అలాగే తిన్న ఆహారం జీర్ణం కాక బోలెడన్ని ఆరోగ్య సమస్యలొస్తాయి.
దంత సమస్యలు
కూల్డ్రింక్స్లో ఉండే యాసిడ్స్, చక్కెర దంతాలకు హాని చేస్తాయి. వీటివల్ల దంతాలపై ఉండే ఎనామిల్ పొర కరిగిపోతుంది. దంత క్షయం ఏర్పడుతుంది. దంతాల మీద బ్యాక్టీరియా చేరి దంతాలు పుచ్చిపోవడం, చిగుళ్ళ వాపు వంటి సమస్యలు కూడా వస్తాయి. దంతాలు సెన్సిటివ్గా మారి చల్లని, వేడి పదార్థాలు కూడా తీసుకోలేకపోతారు.
ఆల్కహాల్ శాతం పెంచుతున్నారు
కంపెనీలు తయారు చేసే కూల్డ్రింక్స్లో 0.05 శాతం ఆల్కహాల్ ఉంటుంది. దీని వల్ల ఆరోగ్యానికి పెద్దగా నష్టం ఉండదు. కానీ కొన్ని నకిలీ కంపెనీలు కూల్డ్రింక్స్లో ఆల్కహాల్ను ఎక్కువశాతం వినియోగిస్తున్నాయి. కార్బొనేట్ నీళ్లలో ఆల్కహాల్ నింపి మార్కెట్లోకి పంపిస్తున్నారు. ఒక సారి వీటిని తాగినవాళ్లు మళ్లీ తాగేందుకు ఇష్టపడేలా చేస్తున్నారు. ఇలాంటివి తాగితే 15 రకాల క్యాన్సర్లు వచ్చే అవకాశం ఉంది. అలాగే మార్కెట్లో కూల్డ్రింక్స్లో తీపి కోసం రసాయనాలు కలుపుతున్నారు. ఇవి నెలరోజులు వరుసగా తాగితే టైప్2 మధుమేహం రావడం ఖాయం. కిడ్నీ, గ్యాస్ట్రిక్ సమస్యలు వచ్చే అవకాశం కూడా ఉంటుంది. మహిళల్లో గర్భకోశ సమస్యలు కూడా ఎదురవుతాయి. అలాగే చాలామంది మద్యపానం చేసే వాళ్లు కూల్ డ్రింక్స్ని ఆల్కహాల్లో కలుపుకుంటారు. అలా చేస్తే లివర్, కిడ్నీలపై అధికంగా భారం పడుతుంది. దీంతో కాలక్రమేణా అవి పనిచేయకుండా పోతాయి. కూల్డ్రింక్స్ తాగాలి అనిపించినప్పుడు సహజసిద్ధమైన పానీయాలను తాగితే మంచి ప్రయోజనం ఉంటుంది.
క్యారెట్ – క్యారెట్లో విటమిన్– సి పుష్కలంగా ఉంటుంది. ఇది ఆరోగ్యానికి మేలు చేయడమే కాదు, చర్మ సౌందర్యాన్ని కూడా కాపాడుతుంది.
కీరా – కీరా దోసలో నీటి శాతం అధికం. అంతేకాదు తక్కువ క్యాలరీలు ఉంటాయి. సహజంగా బరువు తగ్గాలనుకున్నా, చర్మం ఆరోగ్యంగా ఉండాలనుకున్నా కీర దోస జ్యూస్ తాగడం మంచిది. ఇది త్వరగా జీర్ణం అవుతుంది కూడా.
మామిడి రసం– మామిడి తినకుండా, రసం తాగకుండా వేసవి పూర్తి కాదు. పచ్చి మామిడి రసం ఎండవల్ల చర్మం దెబ్బతినకుండా కాపాడుతుంది.
నిమ్మరసం– నిమ్మరసం శరీరాన్ని , చర్మాన్ని హైడ్రేట్గా ఉంచడమే కాదు, అధిక బరువుని కూడా తగ్గిస్తుంది. వేసవి వేడి నుంచి ఉపశమనం పొందాలంటే ఈ జ్యూస్ పక్కాగా తీసుకోవాల్సిందే.
పుదీనా రసం– పుదీనా జ్యూస్ వేసవి వేడితో పోరాడి శరీరానికి చల్లదనాన్ని ఇస్తుంది.
టొమాటో – టొమాటోలో విటమిన్– సి, యాంటీ ఆక్సిడెంట్లు పుష్కలంగా ఉంటాయి, పోషక విలుకలు కూడా అధికం. అందుకే ఈ సీజన్లో టొమాటో జ్యూస్ తాగితే మంచిది.
బరువు పెరుగుతారు
కూల్డ్రింక్స్ని అధికంగా తాగితే బరువు త్వరగా పెరుగుతారు. వాటిలో ఉండే చక్కెర శరీరంలో కొవ్వుని పెంచుతుంది. ఫలితంగా డయాబెటిస్, గుండె జబ్బులు వచ్చే అవకాశం ఉంటుంది. బరువు తగ్గాలి అనుకునే వాళ్లు కూల్డ్రింక్స్కి దూరంగా ఉండాలి. వాళ్లు, వీళ్లు అని కాదు ఎవరైనా సరే కూల్ డ్రింక్స్కి ఎంత దూరంగా ఉంటే అంత మంచిది.
