భద్రాద్రి కొత్తగూడెం, వెలుగు : ఒక్క ఓటుతో బీఆర్ఎస్, బీజేపీ, ఎంఐఎంకు బుద్ధి చెప్పాలని సీపీఐ జాతీయ కార్యదర్శి నారాయణ పిలుపునిచ్చారు. కొత్తగూడెం సీపీఐ అభ్యర్థి కూనంనేని సాంబశివరావు బుధవారం నామినేషన్ వేశారు. ఈ సందర్భంగా లక్ష్మీదేవిపల్లి మండలంలోని మార్కెట్యార్డు నుంచి కొత్తగూడెంలోని ఆర్డీఓ ఆఫీస్వరకు భారీ ర్యాలీ నిర్వహించారు. ఈ సందర్భంగా నారాయణ మాట్లాడుతూ.. బీఆర్ఎస్, బీజేపీ, ఎంఐఎం ఒక్క తాను ముక్కలేనని, వాళ్లను ఉమ్మడిగా ఓడించే అవకాశం వచ్చిందన్నారు.
మోదీ, కేసీఆర్ చెప్పేదొకటి, చేసేదొకటన్నారు. దేశ, రాష్ట్ర రాజకీయ పరిస్థితుల దృష్ట్యా కొత్తగూడెం ఒక్క సీటే తీసుకోవాల్సి వచ్చిందన్నారు. బీఆర్ఎస్ క్యాండిడేట్లను అసెంబ్లీ గేటు దాటనీయమని కాంగ్రెస్ నేతలు అంటున్నారని, ఫామ్హౌస్ కూడా దాటనీయకుండా చూడడమే తమ లక్ష్యమన్నారు. లిక్కర్ స్కామ్లో కేంద్రం కవితను, వైసీపీ నేతలను ఎందుకు అరెస్టు చేయడం లేదని ప్రశ్నించారు.
రాష్ట్రంలో కేసీఆర్ నియంత పాలన సాగుతుంటే కొత్తగూడెంలో కీచకుల పాలన నడుస్తున్నదన్నారు. బీఆర్ఎస్ పాలనతో దగా పడ్డ తెలంగాణ ప్రజల పక్షాన కమ్యూనిస్టులు పోరాడుతున్నారన్నారు. కొత్తగూడెం నుంచి కాంగ్రెస్, సీపీఎం, టీజేఎస్, ప్రజాపంథా, న్యూడెమోక్రసీల మద్దతులో పోటీ చేస్తున్న సీపీఐ అభ్యర్థి కూనంనేని సాంబశివరావును అత్యధిక మెజార్టీతో గెలిపించాలని పిలుపునిచ్చారు.
వనమా పీడ వదలాలి : కూనంనేని
కాపురాలను కూల్చి, సజీవ దహనాలకు పాల్పడే పాలకులు కొత్తగూడానికి అవసరం లేదని సీపీఐ స్టేట్ సెక్రటరీ కూనంనేని సాంబశివరావు అన్నారు. ఆడవాళ్లను చెరబట్టే కీచకులకు ఓటు అనే ఆయుధంతో బుద్ధి చెప్పాల్సిన అవసరం ఉందన్నారు. బీఆర్ఎస్ గెలిస్తే ఆడవాళ్లు బయట తిరగలేని పరిస్థితి ఏర్పడుతుందన్నారు. ఎమ్మెల్యే వనమా వెంకటేశ్వరరావు, ఆయన కొడుకు వనమా రాఘవ పీడ వదిలించడానికే తాను ఎన్నికల్లో పోటీ చేస్తున్నానన్నారు. కార్యక్రమంలో సీపీఐ, కాంగ్రెస్ రాష్ట్ర నేతలు సాబీర్పాషా, దయానంద్, బాగం హిమవంతరావు, రామనాధం, బందెల నర్సయ్య, గుత్తుల సత్యనారాయణ, కె. సారయ్య పాల్గొన్నారు.
