హైదరాబాద్, వెలుగు: టీచర్ ఎమ్మెల్సీ ఎన్నికలో పీఆర్టీయూ అభ్యర్థి చెన్నకేశవరెడ్డికి మద్దతిస్తున్నట్టు సీపీఎస్ ఎంప్లాయీస్ యూనియన్ ప్రకటించింది. గురువారం టీఎస్ సీపీఎస్ఈయూ ఆఫీసులో ఆ సంఘం రాష్ట్ర అధ్యక్ష, ప్రధాన కార్యదర్శులు స్థితప్రజ్ఞ, కల్వల్ శ్రీకాంత్ లను పీఆర్టీయూ రాష్ట్ర అధ్యక్షుడు పింగిలి శ్రీపాల్ రెడ్డి కలిసి మద్దతు కోరారు. సీపీఎస్ ఉద్యోగుల సమస్యల పరిష్కారానికి కృషి చేస్తామన్న లిఖితపూర్వక హామీతో చెన్నకేశవరెడ్డికి మద్దతు ప్రకటిస్తున్నట్టు స్థితప్రజ్ఞ వెల్లడించారు. పాత పింఛన్ వ్యతిరేక శక్తులను ఓడించాలనే ఉద్దేశంతో, సంఘం ప్రైమరీ మెంబర్ల ప్రయోజనాల కోసం ఈ నిర్ణయం తీసుకున్నట్టు తెలిపారు. గత ఎమ్మెల్సీ ఎన్నికల్లో అలుగుబెల్లి నర్సిరెడ్డి, రఘోత్తంరెడ్డి, వాణిదేవీ, రాజేశ్వర్ రెడ్డి తదితరులు సీపీఎస్ ఉద్యోగుల మద్దతుతోనే గెలిచారని గుర్తుచేశారు.
